Shillong, March 8: Meghalaya a•doko Inner Line Permit (ILP)-ko ra•gate on•ningjaengani gimin ILP-ko dabienggipa dingtang dingtang dolrang, jingjengatanirangko dakna mikrakatengon, iani bidingo a•dok sorkari, ma•mong sorkarini aganchakanina sengengkua ine da•al Sombar salo, a•dokni Chief Minister Conrad K Sangma parakataha.
Assembly-ni Budget Session-o Congress dolni MLA Mayralborn Syiem-ni sing•anina aganchakaniko on•angengon, Meghalaya a•doko ILP-ko ra•gatchina dabitokengani gimin a•dok sorkariba iana gisiko nange kamko ka•enga ine Chief Minister parakataha.
A•doko ILP-ko ra•gatchina dingtang dingtang dolrangni dabienganiko nike a•dok sorkari, dingtang dingtang NGO-rang baksa tom•anirangko ong•ate, a•dokona niam gri napsrukanirangko champengna gita dingtang dingtang committee-rangko songe donaha ineba Chief Minister parakataha.
Meghalaya a•doko ILP-ko ra•gatna gita cholrangko nichina a•dok sorkari, ma•mong sorkariko didina jotton ka•enga ineba Sangma aganaha.
Chief Minister-ni parakatani gitade, ILP-ko ra•gatchina dabiani bidingo 2019 bilsini December 19 tarikon Assembly-o resolution-ko ra•e ma•mongni Home Affairs Ministry-na on•atmanahachim.
Meghalaya Residents Safety & Security Act (MRSSA) 2016-ni bidingo janapatskaengon, ia Act ba niamara a•doko songdongenggipa manderangna naljokanijko on•na gita Meghalaya a•dokona re•bae nok para ra•e dongenggipa manderangko segatna aro nok nokgiparangna niamrangko on•na gita dongimin niam ong•achim ine Chief Minister parakataha. 2016 bilsio pass ka•gipa Act ba niamko bilakbatatna aro Meghalaya a•doko dongna sikenggipa manderangni gimin name ning•tue sandina gita ia MRSSA-ko taridapna nangaha ineba Chief Minister parakataha.
Ia Residents Act-ni Ordinance-ko tarianio a•dok sorkari, niamko ma•sigiparang, Law department-ni official-rang, political dolrang aro jatni dingtang dingtang dolrang baksa agangrikchengesa tariahani gimin ian a•dok gimikni ra•chakna man•gipa niaman ong•gen ineba Chief Minister parakataha.
Ia niamrangara, gipin biaprangoni a•dokona re•bae konta 48-na bate dongangna nangenggipa manderangko biming segatchina on•enggipa niamrangsa ong•a aro ia niamrangko ra•gatanichi gipin biaprangoni a•dokona re•baenggipa manderangna maming neng•nikanirang dongjawa ineba Chief Minister talatangaha.
“Meghalaya Residents Safety & Security (Amendment) Bill 2020-ko 2020 bilsini March 19 tariko Meghalaya Legislative Assembly pass ka•e Governor ra•chakchina gita watatmanaha. Da•o iani bidingo chanchirimanirangko dakengkua,” ine Sangma aganaha.
