Guwahati, Aug 30: India a•songni dingtang dingtang biaprangko chalaianio maming dingtanggrikanirang dongjana gita jolprakon skotong songjinma damprakko done, a•song gimiko dambonga skotong songjinmarangko donchina Assam-ni Chief Minister Himanta Biswa Sarma ku•pattiangaha.
Social media-o Delhi-ni Chief Minister Arvind Kejriwal baksa jera ra•grikanio Sarma, ia kattarangko janapataha.
Social media-o Assam Chief Minister-ni parakatani gitade, Delhi-ni Chief Minister Arvind Kejriwal, gipin a•dokrangko onchepna jotton ka•rongani gimin a•songni dingtang dingtang biaprangko chalaianio maming dingtanggrikanirang dongjana gita ua a•songo dambonga skotong songjinmarangko donchina nangnikenga.
“Delhi-ara India a•songni skotong songjinma ong•a aro Delhi songjinmani namroro silroroanina Assam a•dokni manderangko man•chape a•song gimikonin on•giltokenga. Delhi-ni GDP-ara kror lak 14 ong•a aro uamang dam 1200 skulrangko chalaienga indiba Assam-ni GDP-de kror lak 5 ong•a aro iano dam hajal 40-na baten skulrangko chalaiskaenga. Uni gimin Kejriwal gita dakgipa mandede ia a•songni gimin ma•sija aro ma•sina gitaba bang•en somoiko nanggen. Uni giminsa jolprakon skotong songjinma damprakko done a•song gimiko dambonga skotong songjinmarangko donchina anga social media-o janapataha. Indake ong•genchimosa Delhi-ni CM, salgro salaram a•dokrangko mikchepjawa,” ine Sarma parakataha.
