New Delhi, July 15: India a•songo COVID-19-ni ‘Delta’ batroroengani gimin da•o gittamgipa changna giproroaninaba kenchaksona nangenga ine report-o parakaha.
UBS Securities India-ni chief economist Tanvee Gupta Jain-ni parakani gitade, ia sal somoirango India a•songni bang•bata a•dokrangon lockdown-rangko ra•gale kamrangko ka•na aro re•rurana on•piltaiengahaoba gittamgipa changna COVID-19-ni giproroanina kenchaksona nanganirang dongenga.
COVID-ni tikako su•ani bidingo janapatengon, a•bachengachibarade India a•songo salprakon million bri tikarangko su•achim indiba da•o million 3.4-ni ning•ona tang•onange tika su•aniba ka•sinbatengaha ine UBS-ni report- o parakaha.
COVID man•batgipa a•jarangoni 20 percent a•jarango da•o gnigipa changna COVID giproroaniko bon•srangkuaengon gittamgipa changna giproroani a•bachengskaengaha ineba Jain-ni report-o parakaha.
India a•songo salantian da•o COVID man•giparang batrorobataienga ine nikna man•a maina Union Health & Family Welfare Ministry-ni see rakkianiko parakatani gitade Budbar salo sak 38,792 positive ong•ahaon, batanggimin konta 24-ni gisepo sak 41,806 man•daptaiskaahachim. Mongolbar salode COVID man•giparang sak 31,443 ong•skaahachim.
Da•o dipet India a•songo pong 39,13,40,491 COVID tikarangko su•na man•aha aro batanggimin konta 24-ni gisepo sak 34,97,058 manderang tikarangko su•e ra•aha.
COVID-19 gittamgipa changna ka•sinsin giprorona a•bachengengaha ine Budbar salo World Health Organisation (WHO)-ni director general Tedros Adhamon Ghebreyesus-ba parakataha.
