Tura, Jan 16: Mongolbar salo, India a•songni President Droupadi Murmu, Meghalaya a•dokni dingtang dingtang biaprango me•chikrangchi chalaienggipa Self Help Group (SHG)-rang, bading chiwalenggiparang aro game ge•e cha•enggipa manderang baksa Jengjal-ni Baljek airport-o tom•e agangrikangaha aro Meghalaya a•doko me•chikrangchi chalaienggipa SHG-rangko tang•doatna gita rakbee kamrangko ka•engani gimin ua a•dok sorkariko mittelpilangaha.
Ia tom•anio, Meghalaya a•dokni Governor Phagu Chauhan, Chief Minister Conrad K Sangma, Power Minister AT Mondal aro Education Minister Rakkam A Sangma-ba dongpae bak ra•angaha.
Ia tom•anio a•songni President aganprakangkuengon, skang salrangode iandakgipa jinma tom•anirango me•chikrang bang•e bak ra•rongjachim indiba da•alo India a•song re•mikkangengaha aro India a•songni dal•roroenganio me•chikrangba bak ong•engaha ine parakataha.
2047 bilsini gisepo India a•songko developed nation ba chu•gimik tang•dogipa a•song ong•atna niksamsoaniko chu•sokatna gitade, me•chikrangko pilakni gitan bilakbatatchengna nangenga ineba President aganaha.
India a•songo me•chikrangba pilak kamrangon niksenggiparang aro mingsing minggamako man•pagiparang ong•na man•engaha ine janapatengon, me•chikrang an•tangtangni kamrango chu•sokgipa ong•na gita bang•gija ka•dongatani kattarang aro didianikosan nangaia ine President Murmu aganaha.
A•songni namroro silroroanio me•chikrangba bang•en on•gilpana man•na gita India sorkari kamrangko raken ka•enga ineba ua aganaha.
Me•chikrangni gunko ma•sie, uamangna nanga dakchakanirangko on•china gitaba President didiangaha.
SHG membor-rangko re•mikkangangkuchina gita didianiko on•angengon, India a•songo bang•a me•chikrangan iandakgipa cholrangko man•gija noktangtangon nape dongtokna nangenga ine gipin me•chikrangkoba uamangni re•mikkanganio jakkandilchina gita a•songni President, SHG membor-rangko didiataha.
Jinmana aganprakangani ja•man ua, tom•anio bak ra•gipa me•chikrangko grongenba, minute 30-mangna uamang baksa agangrikangaha aro SHG-rangni tarigipa ma•manti bosturangkoba niangjolaha.
Ia tom•anio Meghalaya a•dokni Governor Phagu Chauhan-ba jinmana aganprakangengon, a•dokona re•baahani gimin a•songni President Droupadi Murmu-ko mittelpilangenba, uan a•songni me•chikrangna aro mongsongbate Tribal jatrangna dakmesokani baksa didigipa gita ong•a ine parakataha.
Salgro salaram jolrango namroro silroroaniko ra•bana gita kamrangko ka•engani gimin Prime Minister Narendra Modi-ko mittelpilangengon, Meghalaya a•dokni dal•roroanio a•dokni me•chikrangba bang•en on•gilpaenga ine Governor parakataha.
Ia tom•anio, Meghalaya a•dokni Chief Minister Conrad K Sangma aganprakangskaengon, Meghalaya a•dokara me•chikrangchiko biming ra•gipa a•dok ong•e namen dingtanggipa ong•a aro skangonin Meghalaya a•doko me•chikrangba me•asarang baksa apsan daken, a•dokni namroro silroroanina on•gilpagiparang ong•a ine parakangaha.
Ia tom•anio sak 10,000-mangni gita bakko ra•gipa me•chikrang, Self Help Group-rangna bang•en on•gilanirangko dakaha ineba Sangma aganaha.
Me•chikrangni an•seng baljokanikosan nirokaigija a•dok sorkari, me•chikrangko pilakni gitan mangrakbatatna gitaba kamrangko ka•enga ineba Chief Minister aganaha.
Iakoba poraie nina man·gen: Meghalaya Games-o slai gosusaaniko Goeragreo 2nd Battalion-ni a·damo ong·atenga, a·dokgni dam 12 districtrangoni sak 53 gosusaanio bak ra·na sokbaa
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
