Guwahati, Oct 3: Robibar attamo, India aro South Africa-ni gisepo gnigipa T20 Cricket kal•susaaniko Guwahati songjinmani Barsapara Stadium-o sokachakaniko social media-rango matnange seanirangko Assam Cricket Association jegalatenba, ia kal•susaaniko sokachakanio maming komia dongjachim aro ia kal•susaani namen chu•sokgipa ong•aha ine talataniko on•angaha.
Iani bidingo Assam Cricket Association-ni secretary Devajit Lon Saikia talataniko on•angengon, ia kal•susaaniko sokachakanio maming chu•onggijani dongjaha aro India dolni Virat Kohli baksana gipin kal•giparangba, ia kal•susaaniko name sokachakahani gimin social media-rango mittelpilataha ine parakataha.
Ia kal•susaaniko name sokachakna man•ahani gimin ian mikkangchi Guwahati songjinmao bilake kal•susaanirangkoba sokachakna cholko on•ani gita ong•gnok aro Guwahati-o One-Day baksana Test Cricket kal•susaanirangkoba sokachakna man•gnok ineba Saikai, an•tangni ka•dongchakenganiko parakataha.
