Shillong, Sep 23: Batanggimin jabrini gisepon gong crore 18.33-ni drugs ba pekatgipa samrangko Meghalaya Police rim•na man•aha ine Sukrobar salo, Meghalaya a•dokni Director General of Police (DGP) LR Bishnoi parakataha.
Iani bidingo kobor ra•timgipa manderang baksa agangrikengon, a•doko drugs jakkalani aro badinganiko champengna police-rang bilakbate kamrangko ka•aha aro iani bidingo police-rang, songadam nokadamrango aro jillarangoba manderangna mikrakatanirangko on•enga ine DGP parakataha.
Batanggimin jabrini gisepon police-rang, ming 48 case-rangko segate, sak 134 manderangko rim•aha aro ianoni sak 125-de me•asarang aro sak 9-de me•chikrang ong•a ineba Bishnoi aganaha.
Meghalaya a•doko donggipa dam 12 a•jarangoni dam 8 a•jarango pekatgipa samrangko badingenga aro ia a•jarangara East Khasi Hills, West Khasi Hills, South West Khasi Hills, East Jaintia Hills, West Jaintia Hills, Ri Bhoi, West Garo Hills aro South Garo Hills a•jarang ong•a.
