Tura, June 21: Meghalaya sorkarini ra•gatgipa ‘Jackfruit Mission’-ni ning•o te•brongoniko tarigipa ma•manti bosturangko tang•doatna gita a•dok sorkari kam ka•enga ine Sombar salo, Meghalaya a•dokni Chief Minister Conrad K Sangma parakataha.
Ia Jackfruit Mission-ko a•dok sorkari, 2018 bilsio a•bachengatahachim aro ia scheme-ko Meghalaya sorkarini ning•o donggipa Food Processing Directorate jako ra•e ka•engachim.
Ia program-ni ning•o a•dok sorkari, te•brongko ge•e cha•enggiparangna dakchakanirangko on•na aro uamangni game ge•e man•enggipa bosturangko pala sim•anio dakchakna gita training-rangkoba on•skaengachim.
Sombar salo, Tura-ni Home Science College-o ‘Nano Jackfruit Entrepreneurs’ program-ko ong•atanio a•dokni Chief Minister-ba dongpae bakko ra•angaha aro ia program-ko ong•atanio ua, dolrangko bikotenggipa manderangna gong 5000 ka•e on•enggipa Chief Minister-ni Support for Producers Group-ni gimin agan-talataniko on•angaha.
“Ia program-ni ning•o game ge•e cha•enggiparang ba bading chiwale cha•enggipa manderang apsan nangrime dolrangko bikotenba, an•tangtangni kamrangko bilakbatatna gita sorkarini on•enggipa dakchakanirangko ra•e an•tangtangni kamrangko a•bachengatna man•gen,” ine Sangma parakataha.
Food Processing Directorate aro Tura-ni College of Community Science-ni ong•atanggipa training-o donge skie ra•anggipa manderangnaba dingtangmancha ia program-ko ong•atanio Chief Minister-ni jakchi certificate-rangko on•angjolaha.
Game ge•e cha•giparang aro bading chiwale cha•giparang, dingtang dingtang biterangoniko tarigimin bosturangko pack ka•e palskana man•na gita a•doko packaging unit-rangko kulina gitaba sorkari, iandakgipa dolrangna dakchakanirangko on•enga ineba ia tom•anio Chief Minister parakataha.
Garo Hills-ni dingtang dingtang biaprango chonchongipa karkanarangko bikote cha•anirangko tarienggipa manderang baksaba ia tom•anio a•dokni Chief Minister agangrikangjolaha.
Sorkarini dingtang dingtang ‘Entrepreneurship Promotion Program-rang’ jekai, Prime Hub, E-Championship Challenge aro uandakgipa program-rangchi sorkari, game ge•e cha•giparangko aro bading chiwalgiparangko pala sim•ani a•barangona rimbana kamko ka•enga ineba Chief Minister parakataha.
Tura-ni College of Community Science-o bakan Technology Incubation Centre-ko kulignok ineba ia tom•anio Chief Minister parakataha.
