Shillong, Nov 10: West Jaintia Hills a•jao sak 150-mangni gita Class XI-ni chatro chatrirang, admission-rangko man•tokkujaengaoba sorkarini gita maming ja•kurangko de•jaengani gimin Budbar salo Jaintia Youth Federation (JYF) aro Jaintia Students Movement (JSM) dolrang, sorkarini kosako jegalaniko mesokna gita Lad College-oni DC office-ona re•jomangtokaha.
DC office-ona sokangani ja•man ia dolgni NGO-rang asonge jingjengatna a•bachengon, dolgnini dilgiparangko West Jaintia Hills a•jani Deputy Commissioner Garod LSN Dykes, agangrikna gita okamataha.
Deputy Commissioner-ko grongani ja•man kobor ra•timgipa manderang baksa agangrikengon, Class XI-o admission man•kujaenggipa chatro chatrirangna dakchakanirangko on•ani bidingo DC maming ku•rachakanirangko on•na man•jaha aro ian chatro chatrirangna namen gimaani ong•engaha ine dolgni NGO-rang parakataha.
Iani ja•mano dolgni NGO-rang, ia apsan biapon asonge jingjengatangkuon, uamang niamko pe•e ia biapo jingjengatenga ine ADM-rang parakataha aro uandaken ja•mano NGO-ni dilgiparang, officer-rang baksa adita jegrikani ja•man police-rang ua biapona re•bae jegalenggipa dolni dilgiparangko Jowai police station-ona rim•angaha.
Ia koborko seatengmiting somoiona kingkingde ia dolrangni kosako FIR ka•a dongskakujachim.
