Jowai, Dec 16: Jaintia Hills Truck Owners Association (JHTOA)-ni dabianirangko cement company-rang chu•sokatna ku•rachakahani gimin re•anggipa December 6 tarikonin, East Jaintia Hills a•jani Tuber jolo donggipa Takhniang-o jingjengataniko Bristibar sal dipet ra•galatpilaha.Bristibar salo JHTOA aro cement company-rang, JHTOA-ni office-o tom•aniko ong•atangaha aro ia tom•anio cement company-rang, truck nokgiparangni nangnikanirangko chu•sokatna ku•rachakahani gimin association-ni gita jingjengataniko ra•galpilaha.

JHTOA-ni dabiani gita kilometre-prako aro metric ton-prako gong 7 ka•e gamna gita cement company-rang ku•rachakahani gimin truck nokgiparang, jingjengataniko ra•galpilna tik ka•angaha.Ia tom•a matchotani ja•mano kobor ra•timgiparang baksa agangrikengon, uamangni dabianirangko cement karkanarang chu•sokatna ku•rachakahani gimin uamangni jingjengataniko ra•galpilaha aro Jaintia Hills Cement Manufacturers Association baksaba dabianirang apsan ong•na gita songgigrikanio soi ka•grikanggen ine JHTOA-ni president Nidamon Chullet parakataha.

Indake ong•engon, Jaintia Hills-o truck nokgiparangni namgnina uamangni nangnikani gita kamko jako ra•ahani gimin ua dingtangmancha a•dokni Chief Minister Conrad Sangma aro gitcham Transport Minister Sniawbhalang Dhar-koba mittelpilangaha.

Truck nokgiparangna ian nambatgipa Krismas aro Bilsi gitalni boksis gita ong•aha ineba Chullet parakataha.