Shillong, May 20: East Khasi Hills a·jao chu·gimik lockdown-ko ra·gatani a·sel manderang aro mongsongbate kangal cholgrirang neng·nikanirangko chagrongna nangtokengon, da·o gita sabisi giproroani somoio janggi tangani giminsa chanchie jekoba cha·e dongchina gita Meghalaya a·dokni deputy chief minister Prestone Tynsong, manderangko didiataha.
“Iandakgipa obostao an·ching an·tangtangni janggirangni giminsa chanchina nangenga.
Lockdown-ko ra·gatanio kangal cholgrirangsan ong·ja indiba pilakan neng·nikanikode man·enga. Uni gimin an·ching iandakgipa somoirango be·enrangni pal me·su aro mirangko cha·e dongskana man·gen,” ine Tynsong parakataha.
Salo hajira ka·e cha·enggipa manderang lockdown-ni somoirango janggi tangani cholrang dongjae neng·nikaniko man·tokna nangengani gimin sorkari tangka paisarangko dakchake on·genma ine sing·on, sabisirang giproroengmiting somoiode mamingna bate janggian gamchatbata aro da·o dipet sorkarioni maming dakchakanirang dongjawa ine Deputy CM parakataha.
Re·anggipa bilsiode da·o gita COVID giproroani somoio sorkari, hajira ka·e cha·giparangna aro gipin biaprango jachange dongna nanggiparangnaba tangka paisarangko on·e dakchakahachim ine nikna man·a.
