Shillong, June 22: Meghalaya a•dokni Tura, Nongpoh aro Jowai civil hospital-rango da•o COVID-19 man•e sagiparangko nambate sanna gita oxygen bikotgipa kolrangko man•aha aro ia kolrangchi minute-prako litre 800 oxygen-rangko bikotna man•genok.
Japan sorkari aro United Nations Development Programme (UNDP)-ni dakchakanichi Meghalaya, Nagaland aro Tripura a•dokrangoba gimik damchet oxygen generation plant-rangko songe on•angaha aro ia kolrangchi komibeoba ge 1300 palangrangna oxygen-rangko on•na man•gnok.
Ia oxygen plant-rangko Mongolbar salo Meghalaya a•dokni Chief Minister Conrad K Sangma, kulie on•angaha aro ia oxygen plant-rangko kulie on•angani somoio ua jinmana aganprakatengon, COVID-19-ko bilakbate warachakna man•na gita dakchakanirangko on•ahani gimin UNDP-ko, Japan a•songni manderangko aro Japan sorkariko mittelpilangaha.
India aro Japan a•song damgnian meli nangrime pilak kamrangkon ka•enga aro ia a•song damgnini Prime Minister-rang, dakchakgrikna kusi ong•e da•o pilak kamrangkon meli nangrime ka•enga ineba Chief Minister parakataha.
“Da•o gita neng•nikanirangko chagrongna nangengmiting somoirangosa ia a•song damgnini meli nangrimaniko nikna man•engaha. Ia dakchakanian Japan aro India a•songni gisepo meli nangrimaniko bilakbatatani gita ong•enga,” ineba Sangma, Japan sorkariko mittelpile aganangaha.
Chief Minister-ni parakatani gitade, ia apsan salon, Nongpoh Civil Hospital-ni PSA Plant-ko a•dokni Health Minister AL Hek aro Jowai MCH Hospital-ni PSA Plant-ko Jowai-ni MLA W Shylla a•bachengate on•angskaaha.
