Tura, Oct 21: Bristibar salo, Meghalaya a•dokni Chief Minister aro National People’s Party (NPP)-ni national president Conrad K Sangma, Rajabala constituency-ni ning•o donggipa Takimagre songona re•ange NPP-ni candidate Abdus Saleh-na campaign ka•angtaiaha aro ia songo ua manderangna aganprakengon, jat baseani gri, joltango namroro silroroanina kam ka•nagipa candidate-kosa seokchina didiangaha. 
Budbar salonin ua Rajabala constituency-ni Bhajamara jolo donge, NPP-ni candidate-na campaign-ko ka•engachim.
Re•baenggipa October-ni 30 tariko ong•atna sienggipa Rajabala Assembly constituency-ni bye-election-o susaenggipa candidate-rangoni sakgnide Tribal candidate-rang ong•achim aro uamang jato pangchakesa an•tangtangna vote-rangko salna jotton ka•engachim.
Indake ong•engon, election-ode jat aro torom baseani dongna gita nangja aro joltangna ka•sae dangdike on•nagipa mandekosa dilgipana seokna nanga ine a•dokni Chief Minister aro NPP-ni national president parakataha.
PA Sangma sagini bikote donanggipa NPP-na pu•onchina gita manderangko didiangengon, ia bye-election-o NPP nengraen chegipa ong•aigen ine Sangma, ka•dongbee aganangaha.
Garo Hills-o songdongenggipa mande sakantinan NPP-ara mikkim rasong ong•na nanga aro pilakan NPP-ko bilakbatatna gita ku•mong nangrime kamko ka•na nanga ineba ua aganaha.
Ia tom•anio NPP-ni candidate Abdus Saleh-ba jinmana aganprakangengon, unbaksa bye-election-o susaenggipa gipin dolrang NPP-na aro una kenengani giminsa uko ‘gipin biaponi’ re•bagipa aro Rajabala constituency-ni a•bri jolrango ‘rori’ ine mingenga ine parakataha. Mahendraganj constituency, jeon dingtang dingtang jatrang songdong a•chaengachim, ia constituency-o ua changgittamna kingking MLA ong•aha ineba ua Takimagre songni manderangna parakangaha.
“Angade jat basegipa mande ong•ja aro anga Meghalaya sorkarini gitcham minister-ba ong•a. Ia bye-election-o angko seokgenchimode anga manderangna dangdike on•angkugen,” ine Saleh aganaha.
Garo Hills-o A•chik aro gipin jatrangko channeba mandeni jelbra jelsuani lak 14-mangsan ong•aia indiba PA Sangma sagini bikotgipa NPP da•o national party dolchetoni dolsa ong•paaha ineba NPP-ni candidate parakataha.
Ia tom•anio UDP-na kam ka•gipa Aikos Momin-ko NPP-ni national president Conrad Sangma aro NPP-ni candidate Abdus Saleh, NPP-ona rimchaksojolangaha.
