Guwahati, May 4: “Ku•sikara jatni mikkim rasong aro badia jatoni ong•a uko ma•eke mesokna man•gipa ong•a. Unigimin ku•tangni gamchatanikode mamingchiba tona amja” ine Meghalaya a•dokni skotong minister Pa Conrad K Sangma, Assamni Tamalpuro Bodo Sahitya Sabhani chang 61 gipa tom•bimonganio aganaha. “Boro ku•sikni tang•dorikrikbaani aro nambatroroaniara namen rasong chaani katta ong•a” ine ua Bodo Sahitya Sabhako mittele aganangaha.
Ia tom•bimonganio India a•songni president Ram Nath Kovind, Assamni skotong minister Hemanta Biswa Sharma aro Sikkim ni skotong minister Prem Singh Tamangba dongpae mikkim gnangatbeaha.
Ia tom•anio Meghalaya a•dokni skotong minister, Garo aro Khasi ku•sikko eight scheduleo napatpachina presidentko mol•mole aganangaha. Boro aro Garo ku•sikrangara apsan apsan dakangaia ineba ua tom•ao aganaha. Ku•siktangko ripingna man•a aro uko gamchatnike ripingangna man•a gita dingtang dingtang jatrangko didiangna aro uarangkoba eight scheduleo napate kam ka•na nanganikoba ua janapatjolaha.
