Tura, Aug 27: Garo Hills a·jani dingtang dingtang biaprango sagiparangko sana-bananio nanggipa oxygen-rangko chu·onge on·na man·na gita miksonge West Garo Hills a·jani Jengjal-o gital songgipa Cryogenic Oxygen Plant-ko Meghalaya-ni Power Minister Pa James Sangma-ni jakchi Sukrobar salo oprake on·angaha.
Ia oxygen bikotgipa kolko songanichi Garo Hills gimiknasan ong·aigija songsul a·dok West Khasi Hills a·jaonaba sagiparangko sana-bananio medical oxygen-rangko chu·onga gita sokatna man·gnok ine Pa James, iako oprake on·angani somoio aganprakangaha.
Iako songani bidingo agan-talate on·angengon, “Ia gital songgipa oxygen bikotgipa kolko a·bachengatanichi a·doko, monsongbate agansogimin gita sajinmani gittamgipa chang ong·e sokbatainasigipao sagiparangko sana-bananio nanggipa medical oxygen-ko chu·onga gita sokatanio neng·nikanirangko chagrongna nangjawaha” ine Power minister parakataha.
Indake ong·engon, Garo Hills a·jao ia oxygen bikotgipa kolko matchote songna dakchakgiparangko aro iana dingtangmancha tangka-paisachi dakchakanirangko on·gipa a·dokni skotong minister Pa Conrad K Sangma-maangkoba ua de·mittele aganangaha.
Iako a·bachengate on·ani somoio, Jengjal-ni MDC, Pa Grahambell A. Sangma, West Garo Hills-ni Deputy Commissioner Pa Ram Singh aro gipinrangba dongpatokaha.
