Shillong, April 25: Adita salrangna skang, Karbi Anglong-ni Deputy Commissioner (DC)-ni Jaintia Hills a·jao donggipa Khanduli songko Assam a·dokni a·jaon ga·aka ine agananganiko Jaiñtia Hills Autonomous District Council (JHADC)-ni CEM Pa Thombor Shiwat, mija Sombar salo jegalatenba, maming sakki gri uni iandake a·kangniara ding·chaoataniko ra·baani gita ong·enga ine aganangaha.
Re·anggipa antio, West Karbi Anglong-ni DC Pa Krishna Baruah, Karbi Anglong Autonomous District Council (KAAC)-o donggipa lekkarang ba document-rangni gitade Khanduli songara Assam a·dokni a·amanchan ong·a ine a·kangangahachim.
Iani bidingo KHADC-o Sombar salo tom·e chanchirimangani ja·man kobor see-parakgiparangna aganangengon, JHADC-ni Chief Executive Member (CEM), Khanduli songara da·alona kingkingba Meghalaya a·dokni ning·on ong·enga aro JHADC-an iana certificate-rangkoba on·enga ine parakataha.
Indake nikatna man·gen, chong·motan, KAAC-ni kajinarangko ra·na tax collection post-ko donna forest department-ni Khanduli songo signboard songe dongipani kosako re·anggipa April 15 tariko Khanduli songoni sak ritchana baten manderang jegalangtoka baksana signboard-koba pe·gale galangaha.
