Shillong, Mar 11: Meghalaya a•dokni bilsi 50 gapaniko manianina Meghalaya Democratic Alliance (MDA) sorkari rasong chaengon, Shillong songjinmani JN Stadium-o tarigipa ‘artificial turf’ ba samsi gita dakgipa carpet-ko ane tarigipa kal•chakaniko nosto ka•aha ine Sukrobar salo, All India Trinamool Congress (AITC), sorkariko matnangatskaaha.
Iani bidingo Assembly-ni budget session-o janapangengon, January-ni 21 tariko ia ‘artificial turf’-o dal•begipa pandal-ko rikaha ine ua nike suk ong•jaha ine AITC-ni MLA HM Shangpliang parakataha.
Ia ‘artificial turf’-ko sorkari, robol kal•giparangna aro gipin kal•susagiparangna bang•bea tangka paisarang koros ong•e tariahachim ineba Shangpliang, suk ong•gijaniko parakataha.
Meghalaya Day-ko manianio badita tangkarang koros ong•aha aro sawarang ia program-ko ong•ataha ine sing•doangengon, “Ia program-ko gipin biapoba ong•atna man•aiachim,” ine Shangpliang aganaha.
Assembly-o sing•anirangna Chief Minister-ni pal aganchakaniko on•angengon, DC aro SDO-ni office-rango dormaharangko on•na gita gong kror 3 lak 12-ko nanga ine a•dokni Deputy Chief Minister Prestone Tynsong parakataha.
Meghalaya a•dokni dam 12 a•jarango Meghalaya Day-ko manina gita gong kror 2-ko chamataha ineba ua parakataha.
JN Stadium-o tarigipa ‘artificial turf’-ko nosto ka•a ine matnanganina aganchakaniko on•angskaengon, Sports department, Information & Public Relations, DC Shillong aro Sports association-rang baksa agangrikchengani ja•mansa ia biapo pandal-ko rikaha ine Tynsong parakataha.
Ia biapko taridapaha aro je somoioba ia biapo kal•susaanirangko ong•atna man•aignok ineba ua aganaha.
