Shillong, May 6: Meghalaya a•doko joa kal•aniko aro mongsongbate internet gita joa kal•aniko niamo ong•atna skangba a•dok sorkari, dingtang dingtang dolrang baksa aro a•doko songdongenggipa manderang baksa name agangrikchenggen ine Sukrobar salo, Meghalaya a•dokni Chief Minister Conrad K Sangma, a•dokni Kristian dilgiparangna ku•rachakaniko on•ataha.
A•doko joa kal•aniko niamo ong•atna ja•ku de•engani gimin Sukrobar salo, Khasi Jaintia Christian Leaders Forum (KJCLF)-ni gita a•dokni Chief Minister-ko gronge, an•tangtangni suk ong•gijaniko parakahani gimin a•doko joa kal•ani niamrangko ra•gatna skangba, dingtang dingtang dolrang aro a•doko songdongenggipa manderang baksa sorkari agangrikchenggen ine Chief Minister ku•rachakaniko on•ataha.
KJCLF-ni secretary Rev EH Kharkongor-ni parakatani gitade, joa kal•aniara songsalo ong•sianikosan ra•baani ong•aigija mandenaba namgijaniko ra•baani gita ong•ani gimin a•doko joa kal•aniko niamo ong•atna ja•ku de•enga ine knasoon uamang suk ong•jahani gimin iani bidingo a•dokni Chief Minister-ko gronge agangrikna re•baahachim.
Indake ong•engon, a•doko joa kal•ani niamrangko ra•gatna skangba a•dok sorkari, dingtang dingtang dolrang aro a•doko songdongenggipa manderang baksa agangrikchenggen aro ia niamko ra•gatgenchimoba a•doko songdongenggipa manderangko chel•chakna gita niamrangko donskagen ine Chief Minister, KJCLF-ni dilgiparangna ku•rachakaniko on•ataha.
