Shillong, Sep 12: Adita salrangna skang, Jowai district jail-oni sakdok koidirang joke katgipani bidingo magisterial aro jakgitelgipa inquiry-ko dakchina Sombar salo a•dok sorkari ge•etaniko on•angaha.
“Jowai jail-oni joke katgipani bidingo magisterial inquiry-ko dakchina gita West Jaintia Hills a•jani District Magistrate, Additional District Magistrate PK Boro-na ge•etaniko on•ataha,” ine Sombar salo, a•dokni Home Minister Lahkmen Rymbui, Assembly-o parakataha.
Maini a•sel koidirang pattokoni joke katna man•ahachim, iani bidingo jakgitelgipa inquiry-ko dakchina West Jaintia Hills a•jani Additional Superintendent of Police (ASP)-na ge•etaniko on•atskaaha ineba Home Minister parakataha.
Rymbui-ni parakatani gitade, Jowai jail-oni joke katani ja•man sianggipa sakbri koidirangni bidingo am•sandianirangko dakna gita Additional District Magistrate MA Challam-koba donataha.
Jowai district jail-oni joke katgipa sakdok koidirangoni sakbriko Robibar attamchibara, West Jaintia Hills a•jani Shangpung song sambao donggipa buring damsao, songni manderang ka•a ding•chao so•otgalahani gimin iani bidingoba tale am•sandianirangko dakchina sorkari ge•etaniko on•angaha.
Home Minister-ni parakatani gitade, ia koidirangko chadrapani bidingo police-rang koborko man•soa bakan a•sel ong•chakgipa biapona dariangahachim indiba police-rangko, ka•a ding•chaoenggipa manderang jinma champengsoenba, ia sakbri koidirangko chadrapahachim. Ka•a ding•chaoenggipa manderangni jinma chadrapanio police-rangoniba bang•en saknaanirangko man•aha indiba ja•mano chadrapa man•gipa sakbri koidirangko magistrate-ni permission gnang, civil hospital-ona ra•angna man•ahachim ine Rymbui parakataha.
“Hospital-ona sokangon, ia sakbri koidirangko siakosa ra•baaha ine medical officer parakataha,” ine Home Minister agankuaha.
Ka•a ding•chaoenggipa manderangni chadrapako man•e sianggipa sakbri koidirangara, Moorap songni I Love You Talang, Mootyrshiah songni Lodestar Tang, Thangrain songni Shidorki Dkhar aro Priang songni Marsanki Tariang ong•achim.
Sianggipa sakbri koidirangni manggisiko Ialong civil hospital-ni morgue ba manggisi donchakgipa biapo donengkua ine u•iataha.
Manderangni jinma chadrapanio, UTP ba bichal ka•ako man•enggipa koidi saksade joke katna man•ahachim aro ia koidiara Mihmyntdu songni Ramesh Dkhar ong•na nanga ine chanchichipenga.
Manderangni koidirangko chadrapani somoio, Jowai jail-oni joke katgipa koidi saksa Barato songni Rikmenlang Lamare-de ua biapo dongskajahachim aro da•o dipet ia koidi sakgnini gimin maming kobor dongkujaengani gimin police-rang, ia koidi sakgniko rim•na sandienga ine Home Minister parakataha.
Re•anggipa September-ni 10 tariko, Jowai-o donggipa District Prison & Correctional Services-oni sakdok koidirang joke katani ja•man, ia jail-o kam ka•enggipa sakbonga manderang, chong•motan head warden Rajesh Swer, warder Champmilan Kynjing, temporary warder Damelahun Sun, warder Pyndaphor Bamaon aro temporary warder Alexier Lawtam-ni kosako criminal case-ko segataha ineba Home Minister parakataha.
Ia a•selni bidingo am•sandichenganio ma•sina man•ani gitade, Jowai District Jail-ko cholguga damgittam dake kapenga, jeon skanggipa aro a•palni cholgugako 6th MLP Battalion-ni sipairang nirokenga aro gnigipa baksana gittamgipa cholgugako District Jail-ni sipairang nirokskaengachim. UTP aro rai on•ako man•gimin koidirang pilakan gittamgipa cholgugani ning•osa ong•achim.
Rymbui-ni parakatani gitade, September-ni 10 tarik attamni 1:45 bajimango, ia jail-ni warden, gittamgipa cholgugako napangon, uko koidirang jinma chadrapsoaha aro gittamgipa baksana gnigipa cholgugarango dongtimenggipa sipairangkoba chadrape, gittamgipa cholgugako kulidrana man•aha. A•palni skanggipa cholgugaona sokangon, ia koidirangko 6th MLP Battalion-ni sipairang, slai goponge champengsona jotton ka•ahachim indiba uko koidirang, matsramgipa bostuchi uni skoo doke, ua biapona joke katangna man•aha ine Home Minister parakataha.
Ia a•sel ong•anio, jail-o kam ka•gipa mande sakbri aro police saksa saknaaniko man•na nangaha aro saksakode hospital-o donatna nangaha ineba Rymbui parakataha.
