Jowai, July 11: Jaintia manderangni bilsianti manirongenggipa Behdienkhlam manianiko Sombar sal dipet Jowai-o manina a•bachengataha.

Ia Behdienkhlam manianiko Pnar jatni manderang, Niamtre toromni gita bebera•ani baksa manironga aro ia manianio uamang, dingtang dingtang dakbewal rikbewalrangko ja•rikronga.

Ia Behdienkhlam manianiara Jaintia manderangna namen dingtangmanchagipa maniani ong•a maina ian uamangni Isol saksano bebera•aniko mesokani ong•a.

Ia manianiko a•bachengatani salo Jowai-o donggipa nokdang ge•antian, an•tangtangni ba•rimarangna cha•ani ringanirangko on•pilskaani gita ra•batokaha.