Jowai, Mar 30: West Jaintia Hills a•jani Jowai jillao skatang jabolrangko galenganichi neng•nikanirangko man•tokengani gimin jabolrangko galani bidingo manderangna agan-talatanirangko on•na gita Budbar salo, Jowai jillani Loomiongkjam gittimo dingtangmancha awareness program-ko ong•atangaha.Ia tom•aniko ong•atanio Dr Rev HH Mohrmen, tom•bagiparangna aganprakengon, jabolrangko skatang galaigija, a•salrang gita aro wakrangna cha•anirang gita jakkalskachina ku•pattianiko on•angaha.

Jowai jillao jabolrangko galchakani biaprang dongjani a•sel manderang neng•nikanirangko chagrongna nangtokenga ine janapatengon, Jowai-o Landfill-ko ba jabolrangko a•ao dape galanichide ia neng•nikaniko namatna man•jawa ine Dr Mohrmen aganaha.

Plastic-rangko torang gita jakkalskana man•ani gimin plastic jabolrangko Cement karkanarangona watatskana man•gen ineba ua aganaha.Ia program-ko ong•atanio dongpae jinmana aganprakanggipa gipin manderangara, Myntdu chibimako tange rakkina kam ka•enggipa ‘Khooid Yaka Wah Myntdu’ doloni KL Pariat, Society for Urban & Rural Empower (SURE)-oni Bajop Lyngdoh aro gipinrang ong•a.