Shillong, Aug 18: HNLC-ni gitcham dilgipa Cheristerfield Thangkhiew-ko police-rangni so·otani bidingo tale ma·sie ra·na gita judicial inquiry-ko Meghalaya Human Rights Commission (MHRC)-ni chairperson Justice T Vaiphei dilgen ine Budbar salo, Meghalaya a·dokni Chief Minister Conrad K Sangma parakataha.
“Meghalaya Human Rights Commission-ni chairperson aro ia inquiry committee-niba chairperson ong·e ua mandena on·gimin bilko nian baksana ia judicial inquiry-ko jakgitele aro chu·gimik bil gnange chu·sokatna kam ka·gen,” ine Chief Minister parakataha.
Iako parakatani ja·man Mawlai jolko dilenggipa manderang, a·dokni Chief Minister Conrad K Sangma, Deputy Chief Minister Prestone Tynsong, Cabinet Minister Hamletson Dohling aro sakgipin Cabinet Minister Renikton Lyngdoh-ko gronge, HNLC-ni gitcham general secretary Cheristerfield Thangkhiew-ko so·otanio jak donggipa police-rangoni kamoniko ra·galchina, da·o dipet Mawlai jolrango ma·mongni sipai dolrangko donatjachina, internet-ko on·piltaichina, curfew-ko chu·gimik ra·galchina aro Mawlai jolo donggipa CRPF camp-ko gipin biapona apjitangchina didie memorandum-ko on·angaha.
“Chinga sorkarini gita Mawlai jolo donggipa dingtang dingtang dolrangni nangnikanirangko see rarikaha,” ine tom·a matchotani ja·mano Chief Minister parakataha.
HNLC-ni gitcham dilgipako so·otanio jak donggipa police-rangko kam ra·galchina dabienggipani bidingo janapatengon, judicial inquiry-ni report-ko man·soahaon, report-o pangchake sorkari ja·kuko de·anggen ine Chief Minister parakataha.
“Dingtang dingtang cholrangko nichengesa sorkari ja·kuko de·gen,” ine Chief Minister aganaha.
