New Delhi, June 20: Re•anggipa June-ni 7 tariko a•songni Prime Minister Narendra Modi-ni parakatgimin gita bilsi 18 batgimin pilak manderangnan Covid-19-ni tikarangko June 21 tarik dipet sorkari indin su•e on•anggenok aro ia tikarangko su•e ra•na gita Cowin-o biming segatchengna nangchongmota ong•jawaha.
Prime Minister Narendra Modi-ni parakani gitade, tikarangko a•dokrang, sam tarigiparangoniko brena gita nangjawa aro ma•mong sorkarian 75 percent tikarangkode breenba, maming tangka paisa gri a•dokrangna aro Union Territory-rangna indin suale on•anggen.
Ia gital niamni bidingo talataniko on•angengon, tikarangko breanio aro ra•baanio neng•nikanirangko chagrongna nangtokenga ine dingtang dingtang a•dokrangni badi ka•anirangko man•soahani gimin ia niamko ma•mong sorkari ra•gatskaaha ine Health Ministry parakataha.
Bilsi 18 batgimin pilak manderangnan ma•mong sorkari tikarangko indin on•anggen aro tika su•anirangko a•dokrang nirokskagen ineba Health Ministry parakataha.
Tikarangko skanggipa health care worker-rangna, frontline worker-rangna, bilsi 45 batgimin manderangna aro gnigipa tikarangko su•na nangkuenggipa manderangna on•angchenggen aro uni ja•man bilsi 18 aro una batgimin manderangnaba on•anggen.
Bangki 25 percent tikarangko private hospital-rang breskae, tangka paisa ra•e tikarangko su•e on•skana man•gen indiba damrangko ma•mong sorkari tik ka•e on•gen ineba Health Ministry parakataha.
Indake ong•engon, June 22 tarikonide Cowin.gov.in website-o biming segatchengna nangchongmota ong•jawaha aro private vaccination centre-rangon bimingrangko segatjolna man•aigenon ineba Health Ministry-oni u•iataha.
