Shillong, Feb 1: Ia 2022-23 bilsini Union Budget-o ma•mong sorkari, Meghalaya a•dokko man•chape salgro salaramni pilak a•dokrangnan ka•dongani gnanggipa budget-ko tariaha ine Mongolbar salo, Meghalaya a•dokni Chief Minister Conrad K Sangma, Union Finance Minister Nirmala Sitharam-ko mittelpilangaha.
Ia bilsini budget-na Union Finance Minister-ko mittelpilangengon, re•anggipa bilsini December jao Budget-ni bidingo tom•e chanchirimanio, Finance Assistance Scheme-ni ning•o a•dokrangna tangka paisa chamaniko bariatchina mol•molaniko ma•mong sorkari knachakaha aro ia bilsini gisepon Meghalaya a•dokba gong kror 100-ko man•dapgnok ine Chief Minister parakataha.
Iana agreba, bilsi 50-na sud gri gong kror lak 1-ni loan-ko a•dokrangna on•dapengahani gimin ian Meghalaya a•dokoba sajinmani somoirango economy-ko tang•doe rakkina dakchakani ong•gnok ineba Sangma aganaha.
A•bachengo gong kror 1500-ko chame, chadamberangna aro me•chikrangna janggi tangani cholrangko on•na gita PM-DevINE (Prime Minister’s Development Initiative for North East)-ko North Eastern Council (NEC) gita ra•gatgnok ineba Chief Minister, an•tangni kusi ong•aniko parakataha.
Salgro salaram a•dokrangna dingtangmancha simsak nirokanirangko on•engani gimin ma•mong sorkariko mittelpilangengon, ia PM-DevINE-ni bak gita Shillong-o new administrative city-ko a•dok sorkari rikna miksongenga ine Sangma parakataha.
