Shillong, Sept 19: Meghalaya aro Assam a·dok damgnini gisepo donggipa Karbi jolni Block I-o songdong-a·chaenggipa Khasi jatni manderangni kosako golmal ka·gipa aro uamangko ka·mikkenate dingtang dingtang neng·nikaniko on·enggipa Karbi Anglong jatni kosako Khasi Students Union (KSU), Sombar salo raken jegalangaha.
Iani bidingo KSU West Jaintia Hills-ni president, Laitphar Syngkrem-ni agananganio, “Khasi jatni manderangko ka·mikkenataniko dontongchina gita Block I-oni Karbi jatni manderangko chinga raken mikrakatenga, maina iachi ua jolo donggipa manderangni gisepo kajia-golmalko aro so·so-jengjengko ra·bagen ine parakataha.
“Ua jolo songdongenggipa chingni Khasi-ska jong-adarangko iandake sinjetaniko dakangkuaiode KSU dol knatime jrip dongaijawa, chingaba una raken ja·kurangko de·atskagen”, ineba Syngkrem mikrakataha.
Unbaksana, KSU WJHD-ni secretary, Lenning Grad Tariang-ni agandapatani gita, ia golmalara mongsongde ua jolo Assam police-ni a·tipko rikanichisa ong·na gita a·bachengaha maina uanoni Khasi jatrang janggi tangna gita dingtang dingtang man·gipa bosturangko pale cha·na gita nangtokenga aro uarangonikon Assam police-na gampilskana nangenga.
Iarangna agreba, ua joloni Khasi jatrang minggipin dakgipaoba sinjetanirangko man·tokenga, jekai mi-misiko ge·e-game cha·giparangko tangka bang·e gamatan baksana, bajar-antirangchi re·anggiparangkoba Karbi jatrang gong 300 – 400 ka·e tangkarangko gamatenga aro ua tangkarangba Assam police-chinan sokangenga, aro songni gita tom·e chanchirimanio bakko ra·oba Khasi jatrang neng·nikaniko man·tokenga ineba Tariang janapatkuaha.
Ia pilak obostarang ong·enganina, Block I-o napgipa song dam 36-rangni gita dongani gimin a·dok sorkarini uana dingtangmancha gisik on·e nirokataniko nangengani giminba ua janapatjolaha.
Tariang-ni janapatkuani gitade, Meghalaya-ni police officer-rang ua biaponi chel·aosa dongtokani a·selan pangnaba ua jolchina re·ange nirokea dongja aro Khasi jatrangni nokko, mi-misirangko so·e nostorang ka·ani somoirangoba Khasi-rangna maming dakchakaniko on·ea dongja ine matnange aganataha.
“Jowai ba Khanduli songo tom·arango Khasi songni manderang bakko ra·eoba, Assam police uamangko rama tong·saon ka·mikkenatronga aro songni nokmako mangba tom·anio bakko ra·eode pattoko chipatna gitaba kenatronga” ine Lenning janapatkuaha.
Iarang baksanaba, Nabang Nongphyllut-na Dolloi ong·e dangdike on·china gita JHADC saksako seokna tik ka·grikahachim, indiba da·alonaba be·en pil·kuja ine janapatan baksa, uamangni a·a-chirangko aro mal-gamrangko mikkangchi naljoke rakkina a·ani bimingrangko segatna man·na gita ua jolni manderangni seoke watatgimin mandeko Dolloi songani kamko gong·rakatchinaba JHADC-ko ua dingtangmancha mol·molatjolaha.
