Guwahati, Jan 17: Drugs ba pekatgipa samrangko niam gri badingsrukanirangko Assam a·doko rim·arangoni ianpak bang·batsranggipako sekanio, Assam police mija Mongolbar salo Karimganj a·jaoniko kg 90 ong·pilgipa Yaba tablet-rangko sekaha ine koborko on·ataha.
Koborrangko man·soani gitade, Karimganj police dolsa ua somoio Alto gari AS-10A-6487-ko Bagargul-ni Nischintapur jolo dongdipatenba sandirikkitataniko dakatanio gari ning·oniko pekatgipa samrangko man·aha, uandake, niam gri pekatgipa samko badingsrukgipa Hafiz Uddin minggipa saksako police rim·aha.
Iani bidingo Karimganj-ni Superitendent of Police (SP) Padmanav Baruah-ni koborna aganatanio, Assam a·dokoniko pekatgipa samrangko rim·a gimikoni ian bang·batsranggipa ong·anio chingna namen rasong chabeani ong·chongmota ine aganenba, gimik kg 90 ong·pilgipa aro gong kror 40 damrangni Yaba tablet-rangko Assam police-rang rim·aha aro ian sipai dolrangni mikrake kamrangko ka·atanichi ong·aha ineba ua agandapataha.
SP-ni janapatkuani gitade, gariko salgipa Hafiz Uddin, unomiting gari ning·oniko pekatgipa bostuko man·ani gimin home guard-rangna gong lak 20 tangkarangko on·e jokna jotton ka·ahachim, indiba chu·sokjaha, uandake Village Defense party(VDP)-ni jakdangdikani ja·mano niam gri badingsrukgipa mandeko rim·aha aro NDPS-ni niamo pangchake mamlako segatan baksa da·o ia mamlako sandiatenga ineba ua janapatjolaha.
