Shillong, Feb 4: Khasi Hillsni Ribhoi, Byrnihat gita rel garina rama aro biap on•aniko, aro uko a•bachengataniko Khasi Hills Autonomous District Council aro jatni-toromni dilgiparang jegalsoenga. Uamangni aganani gitade, rel gariko Khasi Hillsona uamangni skaosa pangchaka, aro chingni maming namnikpaani gri a•doko rel gari ra•napbana on•jawa aro on•angjanan tik ka•manaha ine sukrobar salo aganaha.

KHADC-ni CEM Titos Chyne kobor ra•timgiparangna aganengon, Nongksehni Basan, Raid Marwrtni Syiem aro dingtang dingtang songni sordar aro dilgiparang jemangni a•arangkon rel ramana on•a nangengachim, uamang ku•monggrike rel gariko ra•napna on•jana tik ka•angaha ineba janapaha.

“Sorkari chingna ia a•arangko on•china mol•molani lekkarangko seatkamaia, unigiminsa chinga ia tom•aniko ong•atna nangaha, minggipinara, jatko, a•dok-chigako, jatni namgipa dakbewalrangko ripinggipa, chiru-a•gatgipara District councilsa ong•a, uni gimin chinga iako namen ka•na nangenga” ine Chyne talataha.

Iarangko chanchigija bingbang on•aigenchimode tom•daksasan ba jakchomsasangipa a•brini jatrangna namen kenchakanirang sokbabebenaba gnang ine kenchakani kattarangkoba aganjole, gipin jatrangni napdrabaaniko nirokna ILP ko nanganikoba District councilni gitan dabienga ine CEM aganaha.