Shillong, Feb 7: Sombar salo, Khasi Hills Autonomous District Council (KHADC)-ni Chief Executive Membor (CEM) Titosstarwell Chyne, KHADC-ni gipin membor-rang baksa Sixth Schedule-ko taridapani bidingo ma•sie ra•na gita Meghalaya a•dokni Chief Minister Conrad K Sangma-ko grongeaha.
Chief Minister-ko grongeani ja•mano kobor ra•timgiparang baksa agangrikengon, Sixth Schedule-ko taridapna proposal on•aniko Cabinet ra•chakaha ine kobor man•soani ja•mansa uamang, ‘Village Council’ kattako recommend ka•ani bidingo sorkari maiko chanchienga, talbate ma•sie ra•na nangnikaha ine KHADC-ni CEM parakataha.
Chyne-ni parakatani gitade, ‘Village Council’ ingipa kattani biapo ‘Village Dorbar’ ingipa kattako jakkalna man•aigen ine Sixth Schedule-ko taridapna Cabinet-ni ra•chakgipani gimin Chief Minister uamangna talataniko on•angaha aro iani miksonganian Garo Hills-o ‘Village Council’ ingipa kattako jakkalgenchimoba Khasi aro Jaintia Hills-ode ‘Village Dorbar’ kattako jakkalskana man•gen.
Khasi aro Jaintia Hills-ode ‘Village Council’ ingipa kattako jakkalna nangani katta dongjawa ineba ua aganaha.
Da•o changgipin session-o Sixth Schedule-ko taridapna ra•angna skangba iako ra•chakanio maming ma•sisretani aro jajaanirang dongjana gita Delhi-o Home Ministry baksa chanchirimchenggen ineba Chief Minister, District Council-ni membor-rangna ku•rachakaniko on•ataha.
‘Village Dorbar’ ingipa kattako ra•galjachina aro jatni dakbewal rikbewalrangko aro jatni bimangrangko bilakdapatchina gitaba GHADC-ni CEM didiangskaaha.
