Shillong, Feb 23: Khasi Hills Autonomous District Council (KHADC)-ni MDC sakgniba National People’s Party (NPP)-o napangaha aro uamangko Budbar salo, NPP-ni national president Conrad K Sangma, national vice president Prestone Tynsong aro gipin dilgiparang NPP-ona rimchaksoaha.
Nongshken constituency-ni MDC Grace Mary Kharpuri, KHADC election-o Congress doloni susae seokako man•ahachim indiba 2019 bilsio Shella by-election-o susana gita Congress tikitko man•jahani gimin ua Congress doloni ong•kate Independent MDC ong•e dongengachim. Da•o ua NPP-o nape a•songna aro jatna kamko ka•skana miksongenga ine ua parakataha.
Budbar salo NPP-o napanggipa Laitumkhrah constituency-ni MDC Joseph Fantin Lakadong-ba adita salrangna skangsan Congress doloni ong•kate NPP-o napskana manchiaha aro uandaken uko Budbar salo NPP-ni dilgiparang rimchaksoaha.
NPP-o napanggipa MDC Joseph Fantin Lakadong-ara Congress dolni MLA Ampareen Lyngdoh-ni segipaba ong•achim aro da•o ua NPP-o napangahani gimin uni jikgipa Ampareen Lyngdoh-ba NPP-o napangnaba gnang ine ka•dongsona man•enga.
Ia apsan salon, Jirang constituency-ni gitcham MDC WL Mynsong aro gipin dilgiparangba NPP-o napangaha.
Ia dilgiparangko NPP-ona rimchaksoani somoio NPP-ni national president aro Meghalaya a•dokni Chief Minister Conrad K Sangma, jinmana aganprakangengon, da•o dingtang dingtang dolni dilgiparang NPP-o naptokengahani gimin 2023 bilsiode NPP chu•gimik bil gnang re•bapile sorkariko rikna man•gnok ine an•tangni ka•dongsoenganiko parakataha.
NPP-o napanggipa dilgiparangko rimchaksoengon, Isolni pattianichi NPP da•alo dal•rorona man•engaha aro Manipur gita dakgipa a•dokrangoba NPP bilakbatrorona man•engaha ine Sangma parakataha.
Batanggimin bilsibrina sorkariko rikanio NPP-chi dilenggipa MDA dingtang dingtang neng•nikanirangko chagrongna nangaha ine talatangengon, neng•nikanirangko aro ra•bianirangko chagrongna nangahaoba uamang watgaljaha maina NPP-ni bebera•anian watgalanio ong•ja indiba jotton ka•anisa ong•a ine NPP-ni national president parakataha.
