Shillong, May 20: Khasi aro Garo ku•sikrangkoba Constitution-ni Eighth Schedule-ko ra•gatchina dabitokengani gimin Sukrobar salo, Meghalaya a•dokni Chief Minister Conrad K Sangma, Khasi Authors’ Society aro A•chik Literature Society baksa tom•e chanchirimangaha.
Ia tom•aniko a•bachengatani somoio a•dokni Chief Minister, Khasi Authors Society aro A•chik Literature Society-ni dilgiparangna aganprakengon, Khasi aro Garo ku•sikrangko Eighth Schedule-ko ra•gatchina India sorkari baksa agangrikani bidingo chanchirimna aro a•dokni ku•sikrangko sorkarini gita tang•doatna ja•kurangko de•ani bidingo chanchirimna gita ia tom•aniko ong•ataha ine parakangaha.
Khasi aro Garo ku•sikrangko Eighth Schedule-o ra•gatna gita ja•kurangko de•e re•mikkangengon, a•dokni ku•sikrangko skie on•anirangchi ba seminar-rangko ong•atanichisan ong•aigija jawilwat, doka dam•ani aro uandakgipa dingtang dingtang cholrangchiba tang•doatna nangenga ineba Chief Minister aganaha.
Ia tom•anio a•dokni Chief Secretary RV Suchiang, Arts & Culture-ni Commissioner & Secretary CV Diengdoh aro gipin official-rangba dongpae bak ra•angaha.
