Shillong, Dec 16: East Jaintia Hills a•jani Khliehriat C&RD Block-ko Wapung-ona apjitangaha aro ia Block-ko Wapung-ona apjitangna gita dingtangmancha tom•aniko Bristibar salo, Wapungskur songo ong•atangaha.

Ia block-ko apjitangna gita tom•aniko ong•atanio a•dokni Chief Minister Conrad K Sangma, mongsonggipa sokgipa ong•e bakko ra•angaha aro unbaksana C&RD Minister Hamletson Dohling aro Social Welfare Minister Kyrmen Shylla-ba ia tom•anio bakko ra•angaha.Ia tom•anio a•dokni Chief Minister, jinmana aganprakangengon, Khliehriat C&RD Block-ko Wapung-ona apjitataniara sorkarini kamrangko jolni manderangona sepangbatatani gita ong•gnok ine janapangenba, je biaprangon sorkarini kamrangko bilakbatatna nangenga, uandakgipa biaprango block office-rangko kulidapna gita sorkari cholrangko niangkugen ine parakangaha.Bang•bata scheme-rangkon aro mongsongbate ma•mong sorkarini scheme-rangko block-rang gitasa chu•sokate on•enga ine talataniko on•angengon, sorkarini ra•gate on•enggipa scheme-rangko manderangona sokatna gita block office-rangko nangchongmota ine Chief Minister parakataha.