Shillong, Mar 24: Bristibar salo, be·enni gita cholgri ong·gipa manderangna dingtangmancha screening camp ba porikka ra·e niani program-ko East Jainti Hills a·jani DC office, Social Welfare department, Kolkata-ni National Institute For Locomotor Disabilities aro Kyrmen Foundation nangrime, Khliehriat-o donggipa Jaintia Eastern College-o ong·atangaha.
Be·enni gita cholgri ong·gipa manderangna dingtang dingtang dakchakanirangko on·na man·na gita bimingrangko segatna miksonganio ia screening camp-ko ong·atangaha.
Ia screening camp-ko ong·atanio a·dokni Social Welfare Minister Kyrmen Shylla, jinmana aganprakengon, be·enni gita cholgri ong·gipa manderangara Isolni pattigiminsa ong·e namen dingtangmanchagipasa ong·a ine talatangenba, iandakgipa manderangni ma·a paarangko rasong chachina aro Isolni pattigiminko ra·chakchina gita didiangaha.
Ia program-ko ong·atanio dongpae jinmana aganprakanggipa gipin manderangara, East Jaintia Hills a·jani Deputy Commissioner Abhilash Baranwal, Kyrmen Foundation-ni president Fourness Dhar aro gipinrang ong·a.
