Shillong, Mar 6: National People’s Party (NPP)-chi dilenggipa sorkario bakrimeanina Voice of the People’s Party (VPP)-ni matnanganiko Sombar salo, United Democratic Party (UDP)-ni president Metbah Lyngdoh jegalatenba, iano uamang ‘tamasa’ dake rona re•baenga ong•ja indiba kim•kimgipa sorkariko rikna gitasa bakrimeaha ine parakataha.
Iandake UDP-ni kosako matnanganina ua, VPP-ni president Ardent Miller Basaiawmoit-koba raken jegalataha.
NPP-chi dilenggipa sorkario bakrimengani gimin talataniko on•angengon, uamang manderangko togina ‘tamasa’ dake roenga ong•ja aro mikkangchiba manderangko togijawa ine Lyngdoh parakataha.
A•joltangni political dolrangchisa uamangni dolba sorkari rikna jotton ka•ahachim indiba MLA-rang chu•onga gita dongjahani a•sel sorkariko rikna man•jahani gimin uamang NPP-chi dilenggipa sorkario bakrimeana agre gipin cholrang dongjaha ineba UDP-ni president parakataha.
