Guwahati, June 18: Upper Assam-ni Kaziranga National Park and Tiger Reserve-ni a·paloniko gulli nange sigipa matcha bipa mangsako man·aha.
Iani bidingo forest department-ni talataniko on·angani gita, sigimin matchako Japoripathar samba, KNPTR simani a·pal Karuabari-oniko pring 7.10 bajimango forest-ni manderang nikaha.
“Sandianiko dakon, ua matcha gulli nange siaha ine nikna man·aha, jekon mande donggipa biaponiko matchako kenatna jotton ka·mitingo gulli nangchange so·ota man·aha ine chanchichipenga,” ine janapatenba iani bidingo chu·gimikko talna sengengkua ine janapatjolaha.
Ia ong·anga obostani gimin KNPTR-ni director, P Sivakumar, bilsi 10 rangni ong·gipa ua matcha bipa, forest-ni manderangchi slai goanio gulli nangchange siaha ine kakket koborko parakataha.
Iana skang, mija jao Kaziranga National Park-ni Sidha Kathani biap joloniko bilsi 4 ong·gipa matcha bipa siako man·ani ja·man KNPTR-oniko ian gittamgipa changna sigimin matchako man·taianiba ong·enga.
Mija February jaoba, gitok naponga gnanggipa aro guasu be·gimin matcha bima mangsani siakoba ua park-oniko man·ahachim. Forest official-rangni chanchichipe aganani gita, ja 4-rangsan ong·kuenggipa matcha bi·sako matcha dal·gipasa chike siataha.
Batanggimin 2017 bilsini census-o gitade, Kaziranga National Park-o gimik-gimang mang 111 matcharang gnang.
