Shillong, May 25: Da•o mikkang konta 12-ni gisepo, bilakbegipa ‘Yaas’ balminduri, bilakbate salgro-salgro saliramchipak balangskanaba gnang ine Regional Meteorological Centre-oni u•iataha.
Regional Meteorological Centre-oni u•iatani gitade, May 26 tariko ia ‘Yaas’ balminduri bilakbee Dhamra-ni salgro aro Balasore-ni salgipeng sepango Paradip aro Sagar chichangni gisepo donggipa salgro Odisha aro West Bengal sagal rikamrangko balpakangskanaba gnang.
Meghalaya a•dokni dingtang dingtang a•jarangoba ia balmindurina mikrake dongchina gita Indian Meteorological Department (IMD) u•iataniko on•ahachim. May-ni 25 tarikrango East Garo Hills aro South West Khasi Hills a•jarangna aro May-ni 26 tariko West Garo Hills a•jana mikrakataniko on•angahachim.
Ia salgnion Meghalaya a•dokni gipin a•jarangnaba ‘yellow alert’-ko on•skaahachim.
May-ni 26 aro 27 tarikrangna salgro salaramni bang•bata a•dokrangnan mikrakatanirangko on•somanahachim.
