Shillong, Mar 9: Budbar salo, Meghalaya a•dokni Chief Minister Conrad K Sangma, 2022-2023 bilsina gong kror 1,849-ni deficit budget-ko Assembly-ona ra•angaha aro ian Gross State Domestic Product (GSDP)-ni 4.5 percent ong•enga.
Ia budget-ni bidingo a•dokni Chief Minister aganprakengon, chu•gimik receipt-ranga gong kror 18,700 ong•enga aro ianoni gong kror 16,035-de revenue receipt aro gong kror 2,665-de capital receipt ong•enga ine parakataha.
Ra•srogipa gong kror 2,632-ko changale chu•gimik receipt-rangko gong kror 16,068-na hisapenga ine janapatengon, total expenditure ba chu•gimik korosrangara gong kror 18,881 ong•enga aro ianoni gong kror 15,376-kode revenue expenditure-na aro gong kror 3,505-kode capital expenditure-na hisapenga ine Chief Minister parakataha.
Gong kror 964-ni loan chotaniko changale total expenditure-na gong kror 17,917-ko hisapenga ineba a•dokni Chief Minister aro Finance Minister Conrad Sangma parakataha.
Chief Minister-ni parakatani gitade, 2022-23 bilsina interest payment-ko gong kror 1,110-na aro pension payment-ko gong kror 1,469-na hisapenga.
Ia bilsini budget-o ua gender budget, youth budget aro Sustainable Development Goals (SDG) budget-ko ra•baenga ineba Sangma aganaha.
“Gender budget-na gong kror 2,495-ko chamaha aro ian chu•gimik budget-oni 13 percent-mang ong•a aro batanggimin bilsirangona 20 percent bataha. Youth budget-naba gong kror 1,363-ko chamaha aro iana chu•gimik budget-oni 7 percent-mang ong•a. SDG budget-na gong kror 9,182-ko chamskaaha aro ian 19 percent-chi baridapaha,” ine Chief Minister parakataha.
A•dokni GSDP-ni gimin janapatskaengon, ia bilsina gong kror 37,494-ko chamenga aro a•doko economy-ni tang•doaniko nikna ka•dongsoengani gimin 2022-23 bilsini gisepo GSDP-na gong kror 41,10-ko hisapenga ine Chief Minister parakataha.
Chief Minister-ni parakatani gitade, central tax ba ma•mongoniko kajina man•na ka•dongsogipa gong kror 5,105-ni biapo a•dok sorkari gong kror 5,851-ko ia bilsini gisepo man•soaha.
2022-23 bilsina central tax-ni state share-ko gong kror 6,264-na hisapskaenga ineba Chief Minister parakataha.
Special Capital Assistance Program-ni ning•o dingtang dingtang capital project-rangko ra•gatna gita Union Finance Ministry, gong kror 300-ko a•dokna chamataha ineba ua aganaha.
“Revenue deficit grant-na gong kror 1,033-ko, disaster management-na gong kror 76-ko, Autonomous District Council-rangna gong kror 140-ko Urban Local Bodies-na gong kror 69-ko aro health sector-na gong kror 59-ko a•dok man•sokugen,” ine Chief Minister aganaha.
Special Capital Assistance pool-ko gong kror 15,000-oniko gong kror lak 1-ona India sorkari bariataha ine parakatengon, ianoni gong kror 614-ko 2022-23 bilsini gisepo dingtang dingtang mongsonggipa kamrangko ra•gatna gita Meghalaya a•dokna chamaha ine Chief Minister talatangaha.
A•doko bikotgimin lak 32 metric ton koelarangko dakkie galna gita sorkari, ja•kurangko de•enga ine janapatengon, a•doko scientific mining ba niam gita koelarangko bikotanichiba sorkari, tangka paisarangko man•dapna ka•dongsoenga ine Chief Minister parakataha.
Meghalaya a•doko sanna banani kamrangko nambatatna gita sorkari, World Bank-ni gong kror 350-ko dakchake on•anichi tangka paisarangko chamenga ine janapatengon, da•o bilsi bongani gisepon a•dok gimikni dam 659 health centre-rangko namdapatgnok ine Sangma aganaha.
