Shillong, Feb 2: Mija January 30 tarikni attamo Shillongni Kyndailado IED bomko gopretate a•sel ong•atgipa manderangko rim•na man•tokaha aro jeba a•doko indake misilgipa kamrangko ka•e manderangna kenchipchipaniko on•engachim, indakgipa manderangko chinga nie dongaijawa ine a•dokni skotong minister Conrad Sangma Butbar salo cabinet tom•a ja•man aganaha.
“Boma gopretatgipao jak donggipa gimikkon rim•na man•tokaha. Boma tarigipako, bomana jakkalgipa bostuni nokgipako, biapo bomako donegipa gimikkon rim•na man•jok” ine skotong minister parakatjolaha.
Policerangni aganani gitade rim•ako man•gipa sak3 de Shillongonianchim aro saksade Ribhoi district-oni ong•skaachim. Bilsi sokkugijagipa saksa mande jean an•tangko HNLC-ni Shillongni area commander ine aganachim ukode bom bretani adita kanta ja•manan rim•ahachim.
Uamang HNLC bobil dolrang baksa maikai kam ka•aha aro ka•enga uarang gimikkon chinga sandikuenga ineba skotong minister aganaha. Ia indake a•sel ong•aniona aro dos dakgiparangko rim•na man•a gita CCTV camerarangko songjinmani bang•a biaprangon dona nangdapkuengachim. Ia dos dakgiparangko rim•na man•aniba CCTV camerarangni a•selsa ong•aha aro policerang iani gimin sandirokangkugen ineba skotong minister aganaha.
Bading-chiwalgipa manderangko HNLC bobil dolrang ka•mikkenataniko on•engani gimin aganengon, a•doko tom•tomaniko ra•bana chinga raken kamko ka•anggen aro ka•enga.
Uamangko chinga nie dongaijawa, dos dakgiparang aro songsalna kenchipchipaniko ra•bagiparang dostangni kri sastiko man•a nanggen ineba skotong minister aganangaha.
