Shillong, March 2: Kam ka·e cha·enggiparangna labour licence-rangko district council-rang ong·ja indiba a·dok sorkarisa on·na bil donga ine Meghalaya a·dokni Deputy Chief Minister Prestone Tynsong talatangenba, C&RD block headquarter ge·antini labour inspector-rangna Labour licence-ko on·na gita a·dok sorkarisa bilko on·skaenga ine parakataha.
“Re·anggipa bilsiosan chinga Meghalaya Inter-State Migrant Workers Act-ni bimingko niamko ra·gatmanahani gimin da·ode labour licence-rangko district council ong·ja indiba a·dok sorkarisa on·na man·aha,” ine Tynsong, kobor ra·timgiparangna parakataha.
Kamrangko ka·atenggipa dingtang dingtang C&RD block-rangni bidingo janapatengon, “Niamo pangchake C&RD block headquarter ge·antio donako man·enggipa labour inspector-rang, labour licence-rangko on·na man·na gita sorkarisa bilko on·skaenga. Uni gimin labour licence donggijagipa manderangde an·tangtangni nangchongmotgipa lekkarangko sorkarina on·na nanggen aro sorkarini dongimin niamrango pangchake uamang an·tangtangni lekkarangko on·ani ja·manosa chinga uamangna labour licence-rangko on·gen,” ine Deputy Chief Minister parakataha.
Kam ka·e cha·gipa manderangni skatang a·dokona napbaaniko champengna gita a·dokni Cabinet, re·anggipa bilsio Meghalaya Identification, Registration (Safety & Security) of Migrant Workers Rule 2020-ko ra·chake ja·mano ia niamko Assembly-o pass ka·angahachim.
Deputy CM-ni aganani gitade, niam gri kam ka·e cha·giparangko rimbae kam ka·atna man·jana gita nirok sandianirangko dakchina sorkari, labour inspector-rangna bilko on·aha.
“Block-ni gadango labour licence donggijagipa manderang kamrangko ka·e cha·na man·jana gita nirok sandianirangko dakchina labour inspector-rangna bilko on·manaha,” ine ua aganaha.
Adita salrangna skang, South West Khasi Hills a·jao Assam-oni re·bae kam ka·enggipa adita sak manderangko chadrapahani gimin kam ka·e cha·enggiparangna naljokaniko on·ani bidingo sing·anina a·dokni Deputy Chief Minister aro Labour Minister Prestone Tynsong, ia kattarangko aganaha.
An·tangtangni kam ka·atenggipa manderangko labour inspector-rango biming segatchina gita ua contractor-rangkoba didiangaha.
“Labour licence-rangko on·ahaon, kam ka·atenggipa contractor-rang aro kam ka·enggipa manderangba, an·tangtangni licence-ni copy-rangko sepangbatgipa police station-na aro kam ka·chakenggipa biapni dilgiparangna on·atna nanga,” ine Tynsong talatangaha.
