Shillong, April 26: Meghalaya a•doko load shedding-ko ra•gattaina nangengani a•sel dingtang dingtang porikkarangko seenggipa chatro chatrirang neng•nikanirangko chagrongna nangjana gita sorkari nanga gita ja•kurangko de•gen ine Sombar salo, Meghalaya a•dokni Power Minister James K Sangma ku•rachakaniko on•ataha.
Ia sal somoirango MBOSE-ni SSLC aro HSSLC porikkarangko ong•atengon, re•anggipa Sukrobar waljatchionin a•doko load shedding-ko a•bachengattaiahani a•sel porikkarangna poraienggipa chatro chatrirang neng•nikanirangko chagrongna nangtokengani gimin Sombar salo, Federation of Khasi Jaintia & Garo People (FKJGP) central body-ni dilgiparang, a•dokni Power Minister-ko gronge, chatro chatrirangni namgnina ja•kuko de•china didiangahachim.
Indake ong•engon, Load Shedding-ko ra•gatanichi porikkarangko seenggipa chatro chatrirangna maming nangchakeanirang dongjana gita a•dok sorkari, nanga gita ja•kurangko de•anggen ine Power Minister, FKJGP-ni dilgiparangna ku•rachakaniko on•ataha.
Badita salrangna load shedding ba bijoliko kimitangkugen ine sing•on, load shedding-ko ra•gatanichi a•doko songdongenggipa manderang aro mongsongbate porikkarangko seenggipa chatro chatrirang neng•nikanirangko man•jana gita ta•raken Power Minister cholko sandina ku•rachakataha ine FKJGP-ni dilgiparang parakataha.
Load shedding-ko ra•gatanichi da•o ong•atenggipa porikkarangna maming nangchakeanirang dongjana gita gipin cholrangko sandichina gitaba FKJGP, a•dokni Power Minister-ko didiangaha.
