Tura, March 24: Re·baenggipa April jani 12 tariko ong⋅nasienggipa GHADC-na pu⋅onatnasienggipana NPP dol da·onin rakbee wenanirangko dake dolni candidate-rangna campaign-rangko ka·chakatna gita a·bachengaha.
At Mansang under 28-Darugre GHADC constituency to drum up support for our candidate Sh. Henen R Sangma. It’s nice to reconnect with the people & bring them together in support of our party and candidate. Thank you Mangsang for always standing by NPP. pic.twitter.com/12Zkkfpkjz
— Conrad Sangma (@SangmaConrad) March 24, 2021
GHADC eleksinna campaign-ko ka·chakatani gnigipa salo Darugre GHADC constituency-ni ning·ogipa Mangsang-china wenange doloni susaenggipa Pa Henen R. Sangma-na chakpae agananganio, manderangni nang·nikanirangko knachakgipa dolnasa a·jani manderang pu·onna nanga ine NPP-ni padot aro Meghalaya a⋅dokni skotong minister Pa Conrad K. Sangma, Butbar salo mande jinmana aganprakangaha.
Congress dol, India a⋅song gimikon pangchakani bilko gimaataha aro politicalo dangdike on·angkuani gisik uamango grijok. Dolni padot ong·na gita mangmangba ma·mong aro a·dokni gadangoba uamango maming cholan dongjajok ine aganenba, ma·mong aro a·dokni maming dakchakani gride council-ko chalaina gita man·jawa uni gimin, ruling party ba bil-sasono ong·enggipa NPP dolna pu⋅ontokchina gita Pa Sangma, manderangko mol·molangaha.
Meghalaya-ni district council-rangko chalaina gita ma·mong sorkari, gong kror 700 mang tangka-paisarangko chamatna kusi ong·aha, jeoni gong kror 250 mangko GHADC, Garo Hills-ni songko-nokko namdapatanirangna jakkalna gita man·gen.
Congress dolni tol·e matnangani kattarangchi maming dakeba salpinapako man·toknabe ine manderangko didiangengon, NPP dolna aro dolni candidate-rangnasa uamangni gamchatgipa vote-rangko pu·ontokchina Pa Sangma mol·molangkuaha.
Unomiting, Pa Henen R. Sangma-na campaign ka·anganio bakko ra·angpae, Assembly-ni dakchakgipa agan-chalaitimgipa aro NPP dolni dilgipa Pa Timothy D. Shira, a⋅dokni skotong minister Pa Conrad K. Sangma aro NPP-ni gipin a⋅gipi dilgiparang gimikni dongpaanio Congress dolni tol·e GHADC-ko namdapatna aganani kattarangko raken jegalanga baksana Congress-de namen tol·na sapgipa dolsa ine mande jinmano aganprakaha.
Ma·mongo aro a·dokoba sorkariko rikna man·chenggijara Congress dol maikai GHADC ko namdapatna miksongenga? Uni gimin pu⋅onna skangba manderang namedake chanchiesa pu⋅ona nanga aro dingtanganina aro namdapanina NPP dolna pu⋅ontokchina gitaba Pa Sangma manderangko didiangjolaha.
