Shillong, Apr 15: Bilsi 50-na Assam aro Meghalaya a·dokni simarango meligrikgijanirangko namatna gita a·dok damgnini sorkarirang, ja·kurangko de·chakate, ia meligrikna man·jaenggipa biaprangko sualgrikengon, Meghalaya a·dokni ning·o ga·akgipa songrangko Assam a·doko napatengani gimin ia songrango donggipa manderang aro Opposition dolrang, NPP-chi dilenggipa MDA sorkarini kosako jegalanirangko daktokenga.
A·dok damgnini simarango gimik dam 12 jolrango meligrikgijanirangko nikna man·engachim aro ia biaprangara, Tarabari, Gizang reserve forest, Hahim, Langpih, Borduar, Boklapara, Nongwah-Mawtamur, Khanapara-Pillangkata, Deshdoomreah, Block I & Block II, Psiar-Khanduli aro Ratacherra jolrang ong·engachim.
Ia biaprango meligrikgijanirangko namatna kam ka·anio pilakni nangnikani gita kamrangko chu·sokatna man·jagenchimoba NPP-chi dilenggipa MDA sorkari, Meghalaya a·dokni Chief Minister Conrad K Sangma-ni dilanichi, ia jolrango meligrikgijanirangko changsanon namatna gita miksonge ja·kurangko de·skaengachim.
Uandaken, a·dok damgnini sorkarirang, re·anggipa March 29 tariko MoU-o soi ka·grike, ia meligrikna man·jaenggipa biaprangoni damdok jolrangko skanggipa bako namatchengna gita biaprangko sualgrikahachim. Biaprangko sualgrikanio Meghalaya a·dokni mitam biaprangkoba Assam-o napatskana nangahani gimin a·dokni Opposition All India Trinamool Congress (AITC) dol, iani bidingo cholko ra·e sorkarini kosako jegalanirangko dakskana a·bachengaha. Re·baenggipa 2023 bilsini Assembly election-na AITC dol, kamrangko ka·na a·bachengahani gimin ia cholko ra·e AITC-ni dilgiparang, Assam-o napatenggipa songrangona re·ange sorkarini kosako matnanganirangko dakna a·bachengatskaaha.
Assam aro Meghalaya a·dok damgnini simarango meligrikna man·jaenggipa biaprangoni Tarabari, Gizang, Hahim, Boklapara, Khanapara-Pillangkata aro Ratacherra jolrangko skanggipa bako namatchengna miksonge, a·dok damgnini sorkarirang, ‘on·sregrikani’ niamo pangchake soi ka·grikangahachim. Ia meligrikna man·jaenggipa damdok jolrango gimik dam 36 songrang donga aro ia dam 36 songrangoni dam 30-ko Meghalaya-o aro dam 6-ko Assam-o napatskana dolgni sorkarirang manchiaha. Ia damdok jolrango gimik 36.79 sq km-rang donga aro ia 36.79 sq km-oni 18.51 sq km-ko Assam-o aro 18.28 sq km-ko Meghalaya a·doko napatskana tik ka·grikahachim.
Adita salrangna skang ong·atanggipa Meghalaya Assembly-ni budget session-oba a·dokni Chief Minister Conrad K Sangma, Tarabari jolrango Meghalaya a·dokni a·kangenggipa damchet songrangan Meghalaya a·dokon ong·aigen ine parakatahachim.
West Khasi Hills a·jani Gizang jolrango golmal ong·enggipa damgittam songrang, chong·motan Malsapara (Malchapara), Amagaon aro Gohanimara songrang donga aro ia damgittam songrangoni Amagaon aro Gohanimara songrangde Meghalaya-ni ning·on ong·gen.
Hahim jolrango meligrikna man·jaenggipa dam 12 songrangoni dam 11 songrang Meghalaya a·dok ning·on ong·skagen.
Ri Bhoi a·jao Boklapara songde Meghalaya a·doko ong·e, Jumrigaon songde Assam-o napangskagen.
Khanapara-Pillangkata jolrango, Pillangkata, Maikoli aro Barapathar-ni mitam bakrangde Meghalaya ning·on ong·gen indiba Assamese-rangni songdongenggipa Khanapara aro Dreamland Resort-ko Assam-o napatskagen. Ia jolni Brahmaputra Realtors-ko man·chape gipin bakrang gimikan Meghalaya a·dokon ong·gen.
Patharkuchi joloba mitam bakrangde Meghalaya a·dokon ong·gen.
Maikhuli jolo Mawmari Beel-de Assam-o ong·gen aro gopramde Meghalaya a·doko ong·skagen.
East Jaintia Hills a·jao Malidor, Ratacherra aro Border Umperdeit jolrang gimikan Meghalaya a·dokon ong·gen indiba song damgnide Assam-o napangskagen.
Ia biaprangko sualgrikna skang a·dok damgnini regional committee-rang, songrangona re·ange songni manderang baksa agangrikchenganirangko dakan baksana a·dok damgnio donggipa a·ani lekkarang aro 2011 bilsio a·dok damgnini on·sregrikgipa lekkarango pangchakesa ja·kurangko de·aha aro uandaken Malchapara aro Malang Salbari songrangkoba Assam-o napatna nangao ga·akaha ine kobor on·timgiparang u·iataha.
Hub News-ni man·gipa lekkarango parakani gitade, Malsapara (Malchapara) songo donggipa manderang Assam-o ong·nikna nangnikaniko paraktokaha aro Amagoan aro Gohanimara songrangara Meghalaya a·doko ong·na sikaniko paraktokskaahachim. Malang Salbari songkode 2011 bilsio Meghalaya a·dokni gitcham chief minister Mukul Sangma-ni dilanichi gitcham sorkarini Assam baksa on·sregipa map aro simarango pangchakesa Assam-o napatskana nangaha ineba kobor on·timgiparang parakataha. 2011 bilsio a·dok damgnini on·sregipa map aro sima salanio Tarabari jolni 4.69 sq km-mangmangkosan Meghalaya a·dokni ning·o ga·akgipa ine parakaiahachim aro iano Malang Salbari songkode watchanggalahachim. Ia bilsirangni gisepo Malang Salbari song apalbatrorona a·bachengaha aro ia song, a·dok damgniko sima kagipa Mirekchi chiringna batangahachim. Regional Committee-ni report-o parakani gitade, Mirekchi chiringna skang donggipa Malang Salbari songni bakrangde Meghalaya a·dokon ong·angkuaigen indiba Mirekchi chiring batanggipa songni bakrangde Assam-o napangskagnok.
West Khasi Hills a·jani Gizang ning·o donggipa Malsapara (Malchapara) aro Tarabai jol ning·o donggipa Malang Salbari songrang, jeon A·chikrang songdong a·chatokengachim, ia songrangko Assam-o napatenganina ia songni manderang, an·tangtangko Meghalaya sorkari pale cha·aha ine matnangtokenga aro ia songni manderangna AITC-ni dilgipa Dr Mukul Sangma aro gipinrangba songrangona re·ange chakpaanirangko on·engachim.
Itihasko am·sandichenggija aro a·ani lekkarangko nichenggija Meghalaya sorkari, Assam sorkari baksa songgigrike ia songrangko Assam-na on·ataha ine Dr Mukul Sangma matnangenba, iani bidingo ua songni manderang dakgrikchakna gitaba ku·rachakengachim.
Indake ong·engon, a·dok damgnini simarango meligrikna man·jaenggipa biaprangko namatna gita a·dok damgnini sorkarirang, 2011 bilsio on·gipa map-rango pangchakesa songgigrike soi ka·grikskaahachim aro ua somoio ia map ba wa·rengko da·o opposition dolko dilenggipa Dr Mukul Sangma an·tangan, Meghalaya a·dokni chief minister ong·e Assam-na pakwatatahachim ine nikna man·a.
Ua somoion Meghalaya aro Assam a·dokrangni gisepo meligrikna man·jaenggipa biaprangko bak dake aro dingtang dingtang dolrang baksa agangrike Assam-na on·atmanahani gimin da·o ong·enggipa Meghalaya sorkaride, ua somoio songgigrikgimin wa·rengosa pangchake songgrikaniko dakna nangskaiahachim.
2011 bilsion Dr Mukul Sangma-ni dilanichi Congress dolni dilenggipa MUA sorkari, Assam baksa meligrikna man·jaenggipa dam 12 biaprangko seokmanaha aro a·ani lekkarangko Assam sorkarina on·atahachim. Ua somoion pilak nanga lekkarangko Assam-na on·atahaoba a·dok damgnini gisepo agangrikanirang chu·sokgipa ong·chipna man·jaha.
1972 bilsio ‘The Assam Reorganisation (Meghalaya) Act 1969’-o pangchake, Meghalaya a·dokko Assam-oniko ma·ekatani somoion a·dok damgnini simarango meligrikna man·gijanirangko nike, Assam-ni gitcham chief minister Gopinath Bordoloi-chi dilenggipa 1951 committee, iako segate donataha.
Ua somoio Bordoloi Committee, Meghalaya a·dokni Jaintia Hills a·jao ga·akgipa Block I aro Block II-ko Assam a·dokni Mikir Hill (Karbi Anglong)-ona aro Meghalaya a·dokni Garo Hills-o ga·akgipa mitam biaprangko Assam a·dokni Goalpara a·jaona apjitatchina ku·pattianiko on·angahachim.
Ia ku·pattianirangko ua somoio Meghalaya sorkari jegalatenba, ia jolrangara Khasi-Jaintia Hills a·jarango ga·akgipa biaprangsa ong·a ine a·kangahaoba, ia a·arangko kangna gita ua somoio Meghalaya a·doko maming nangchongmota lekkarang dongskajahachim.
Uandake uni ja·man ia biaprangni bidingo a·dok damgnini meligrikna man·gijaniko a·dok damgnian namatna jotton ka·baengahachim.
Uandaken indita bilsirangna a·dok damgnini simarango so·sojengjeng ong·anirangko nikna man·ahani gimin 2022 bilsini March 29 tariko, ia meligrikgijaniko changsanon namatsrangna miksonge, Assam aro Meghalaya sorkarirang songgigrikaniko dakaha aro songgigrikaniko 2011 bilsio a·dok damgnini gisepo on·grikgimin lekkarango pangchakesa soi ka·grikaha.
2011 bilsio Meghalaya a·dokni a·kangani gita, Malsapara (Malchapara) songba Gizang jolo meligrikna man·jaenggipa damgittam songrangoni damsa ong·achim. Ia songona regional committee-ni re·ange agangrikani somoio songni bang·bata manderangan Assam-o ong·na nangnikaniko paraktokaha indiba gipin song damgni, chong·motan Amagoan aro Gohanimara songrangde Meghalaya a·dok ning·o ong·na nangnikaniko paraktokskaaha.
Gizang Reserve Forest, jean Malchapara songni saliramchipak ong·achim, ia jolrangkode skangonin Assam a·dok ning·osa chalaiahani gimin ia jolrangba Assam a·dokon ong·angaigen.
Ia pilak ja·ku de·anirangko nigenchimode, ia ja·ku de·aniko NPP-chi dilenggipa MDA sorkari, 2011 bilsio Dr Mukul Sangma-ni dilanio gitcham MUA sorkarini am·sandie songgigrikgimino pangchakesa de·aha ine ma·sina man·a aro iandakmiting somoio opposition dolni aro mongsongbate Dr Mukul Sangma-ni dilanio AITC dolni, MDA sorkariko matnangna jotton ka·aniara, an·tangtangni kamko dongnuna jotton ka·anisan ine nikna man·a.
Meghalaya a·dokni bilsi 50-na re·mikkangbaanio, ia jolrango songdongenggipa manderang bang·en duk mikchiko chakna nangaha aro ia duk mikchiko changsanon bon·atna miksonganiosa a·dokni Chief Minister Conrad K Sangma, ia songgigrikaniko Assam sorkari baksa dakna nangaha.
