Tura, Nov 16: Malaysia-ni Penang Adventist Hospital-oni Public Health Doctor, Dr Edward Nathan, jean West Garo Hills a·jao medical camp-ko ong·atgipaona Vellore aroba Malaysia-oniko Vellore alumni doctor-rangko rimbaanio mongsong jak dongachim, Tura aro Jengjal biap damgnio sagipa-ding·giparangko porikka ka·e uamangna sana-bananirangko on·ani gimin adita aganangaha.
Da·ororo dingtang dingtang saanirangko man·anichi Salgro-salaram jolo donggipa manderangni an·seng-baljokanina jajrengna nanggnigipa, mongsongbate sada-biri aro ta·makku ba uandakgiparangko jakkalanichi cancer man·e saani gimin an·tangni suk ong·gijaniko parakangaha.
USA-ni West Coast-o ge·sa namen niksengbatgipa hospital-oba dangdike on·enggipa Dr Edward Nathan, skanggipa medical camp-ko A·chik a·songo ong·atchengenganio manderang an·tangtangni saanirangko ra·e sanna gita bang·en re·batokaniko nike, specialist-rang aro nanggipa bosturangko bang·bate ra·badapachi iandakgipa apsan camp-rangko mikkangchiba ong·attaina nangnikenganiko aganangaha.
Sabisi baksa dakgrikanio, jolni manderangna namen nangchongmotenggipa cancer screening-ko chinga dakna gita nangnikenga ineba Dr Nathan parakataha.
