Shillong, Jan 10: Songo noko rongtal an•talaniko rakkina gita Union Finance Ministry-ni chame on•atgipa tangka paisarangko Garo Hills Autonomous District Council (GHADC)-o kam ka•enggiparangna dormaha on•anio jakkalsretaha ine kobor on•aha.
15th Finance Commission-ni ning•o ma•mong sorkari, Meghalaya a•dokni songko nokko chalaienggiparangna, Basic Grant-ni ning•o gong kror 91-ko aro Tied Grant-ni ning•o gong kror 91 tangkarangko, GHADC, KHADC aro JHADC-na chamatahachim ine kobor on•timgiparang u•iataha.
Kobor on•ani gitade, ia Basic aro Tied Grant-rangko ma•mong sorkarini Finance Ministry changgni dake a•dokni damgittam autonomous district council (ADC)-rangna on•atahachim aro ia tangkarangko council-o kam ka•enggiparangni dormaharangko on•na ba council-ni gipin kamrangnaba jakkalna man•jachim.
Ma•mong sorkarini chamatgipa tangka paisarangoni Tied Grant-kode songo noko rongtal an•talaniko rakkina, songo noko ringani chirangko on•na aro uandakgipa kamrangnasan jakkalna man•aiachim indiba ma•mong sorkarini chame on•atgipa tangka paisarangko re•anggipa bilsion GHADC-o kam ka•enggiparangni kam ka•gija jingjengatengmiting somoion jakkalsrete, ia tangkarangoniko komibeoba gong kror 20 tangkarangko kam ka•giparangni dormaharangko on•na gita jakkalsretaha ine kobor on•timgiparang parakataha.
Kobor on•timgiparangni u•iatani gitade, GHADC-o kam ka•enggiparangni man•na nangkuenggipa bangki dormaharangko on•na gita GHADC-ni CEM Benedic R Marak, ia tangkarangko badita chang dake 2021 bilsini Krismasna skangan jakkalskaaha.
Adita bilsirangna skangsan, GHADC-o gitcham chief executive member Dipul Marak-ni dilanichi, ma•mong sorkarini chamatgipa gong kror 100-na baten tangka paisarangko GHADC-ni Executive Committee jakkalsretahachim ine nikna man•a.
