Williamnagar, October 29: Williamnagar jilako name nikatgipa Balchol A•bri-o, Manda Nokpante A•chik Culture Society-ni ong·atgipa salsani Wangala Festival, Sonibar salo nambee matchotangaha.
Ia Wangala Festival-ona Williamnagar-ni MLA aro PHE Minister Marcuise N. Marak, mongsonggipa sokgipa ong·e bakko ra·angaha aro East Garo Hills-ni Deputy Commissioner Vibhor Aggarwal-ba dongpae bak ra·angaha. Indake ia manianio gipin agipi dilgiparangba dongpae bakko ra•angaha.
Ia manianiko a•bachengna, cha·chat so·e aro rugale a•bachengaha aro sokbagiparangna A·chikrangni chu bitchiko pongrango kanangtokaha.
Indake ia manianio dolbri Wangalgiparang, chong·motan Rongsak Wangala Group, Rapdikgre Wangala Group, Williamnagar Art and Culture Wangala Group aro Manda Nokpante A•chik Culture Society dolrang chrok-mesae uamangni changa sapaniko jinmana mesokangaha aro bon·chotao ia dolbri, apsan chroke, sokbagiparangkoba chrokdilangaha.
Ia manianio mongsonggipa sokgipa ong·e Marcuise N. Marak, jinmana aganprakengon, A•chik jatni dakbewal-rikbewalko ripingna miksonge ia festival-ko ong•atan baksana ia manianiko chu·sokgipa ong·atna man•ahani gimin ia festival-ko ong·atgipa dol aro Manda mahariko mittelpilataha.
Ia manianio, East Garo Hills a·jani DC Vibhor Aggarwal-ba dongpae aganengon, indake gimaangenggipa A•chik jatni dakbewal rikbewalko ripingna kam ka•aniara bilongen nama ine agane, ia Wangala manianiko ong·atna gita dakchakanirangko on·ahani gimin Williamnagar-ni MLA aro a·dokni Minister Marcuise Marak-ko mitteljolangaha.
Indake, ia Wangala Festival-o bak ra·gipa dolrangna, sokbagiparangni jakchi boksisrangko on·angaha.
Ia Wangala manianiko ong·atani bidingo Manda Nokpante A•chik Culture Society-ni adviser Leninson Ch. Marak, Hub News-na talatangengon, ia Wangala Festival-ko Marcuise N. Marak-ni dakchakachisa pangna bilsian ong·atenga aro ia festival-ko ong·atani miksonganide A•chikrangni chrok-mesaani aro dakbewal rikbewalko maikai mikkangchina ripingangkuna man·gen, unasa ong·atenga ine parakataha.
Iakoba poraie nina man·gen: KSU, rong·mesak bikotaniko jegaldilgipa Spility Lyngdoh-ni siani salko gisik ra·anga
Watch
