Tura, Jan 31: Sombar salo, West Garo Hills a·jani police-rang, 100 Battalion BSF-ni sipairang baksa Raksamgre constituency-ni Tikrikilla Police Station-ni ning·o donggipa Photamati bibrao gong crore gnimangni gram 400 ong·gipa ‘heroin’ samrangko mande saksaoniko man·aha.
Iani bidingo police-rang, Assam South Salmara a·jao donggipa Kusnimara songni bilsi 24 ong·gipa Zakir Hussain-ko rim·aha.
West Garo Hills a·jani SP VS Rathore-ni u·iatani gitade, ia mande, rim·a man·gipa samrang baksa Assam Goalpara-oni Mankachar-ona re·angengachim.
Apsan salon, Garo Hills-ni dingtang dingtang biaprango nirikkianirangko dakenggipa dolrang, gimik gong 12,47,630 tangkarangkoba dingtang dingtang manderangoniko rim·na man·aha ine SP parakataha.
Re·baenggipa February 27 tariko Assembly election-ko ong·atengani gimin police-rang aro election official-rang, niam pe·giparangko bilakbate nirok sandianirangko dakenba, gong crore 1-mangni litre 30,000-mangni gita churangkoba rim·na man·aha ine kobor on·aha.
