Shillong, May 8: Sombar salo, Meghalaya a•doko songdongenggipa Manipur a•dokni Hmar, Kuki aro dingtang dingtang jatni dilgiparang, nanga gita dakchakanirangko on•china mol•moleahani gimin uamangna a•dok sorkari bil ama gita dakchakanirangko on•gen ine Meghalaya a•dokni Chief Minister Conrad K Sangma ku•rachakaniko on•ataha.
Ian uamangna namen neng•begipa somoi ong•enga ine sorkari ma•sichakengani gimin dakchakanirangko nangenggipa manderangna a•dok sorkari man•a gita dakchakanirangko on•gen ine Sangma parakataha.
Chief Minister-ni parakatani gitade, uamangni neng•nikanirangko uamang ma•mong sorkari baksa agangrikchina gitaba uko grongegipa dingtang dingtang jatni dilgipa mol•moleahani gimin ua saksa political dolni dilgipa ong•e ma•mong sorkari baksa agangrikna ku•rachakaniko on•ataha.
Dakgrik dinggrikanide nangnikanirangko chu•sokatani chol ong•ja ine janapatengon, so•sojengjeng ong•atanirangko dontongchina aro tom•tomaniko ra•bapilchina gita Sangma, Manipur a•dokni manderangko mol•molataha.
Indake ong•engon, da•o dipet Manipur-o jachange dongna nangenggipa manderangoni sak 300-na baten manderangko Meghalaya a•dokona naljokani gnang rimongkatbana man•aha ine Chief Minister parakatenba, da•o Manipur-o bang•gija manderangsan jachange dongna nangkuenga aro mitamrangde biaptangtangon dongrikna nangniktokenga ine talataniko on•angaha.
