Imphal, July 20: Manipur a·dokni warachakgipa Congress dolna dal·en gimaani ong·enganio, Congress dolni padot Pa Govindas Konthoujam, Mongolbar salo kamtangko wataha ine koborko man·soaha.
Ja·pangoniko koborko man·soani gitade, ru·utgijan ong·kattoknasienggipa gipin sakchet Congress MLA-rang baksana Pa Konthoujam, Bharatiya Janata Party (BJP) dolo napangtoknasienga.
Indake ong·engon, re·baenggipa bilsio Manipur-o Assembly eleksin ong·nasienggipao ian BJP dolchi bakrime rikenggipa sorkarina man·dapani ong·gen ine nikna gita man·enga.
Kamtangko watenggipa Pa Konthoujam-ara Bishnupur Assembly Constituency-oni gimik chang-dokna kingking Congress dolni MLA-na joljol seokako man·gipa ong·an baksana Manipur Pradesh Congress Committee (MPCC)-ni Congress Legislature Party-ni chief whip-ba ong·achim. Uko re·anggipa bilsiosan Congress dolni ma·dot ong·anggipa Ma Sonia Gandhi-chi MPCC-ni padotna seokangahachim.
Iani bidingo dolni skotong dilgipa Ma Sonia Gandhi-ba u·imanaha ine janapatan baksana, Ma Sonia Gandhi-ni agan-ku·pattiata gita Manipur-ni AICC-ko chu·gimik nirokatenggipa Pa Bhakta Charan Das, Manipur Congress-ni dilgiparang aro a·gipi dilgiparang baksa gronge iani bidingo agan-golpogrikna Butbar pringo sokbagen ine Manipur Congress-ni agantimgipa Pa Ningombam Bupenda Meitei, uni Twitter-o see parakataha.
