Manipur, Feb 17: BJP dol uamangni miksonganirangko separakgipa ba, dolni manifestoko, BJP national padot JP Naddachi Bristibar salo Imphalo parakate on•angaha
Ua separakgipao janapani gitade BJP dol Manipur a•dokni manderangna dingtang dingtang namgnirangko, gital ja•ku ga•anirangko, jatni bidingo chelchakanirangko, songpanggipa manderangni bil gnanganiko, a•dok nokgipa ong•e joltango bil man•aniko, songpanggipa manderangni jakgitele janggi tanganiko ra•bagen ingiparangko nikna man•aha.
Naddani aganani gitade Ujjala Yojna ingipani ning•o indin LPG cyllinder-rangko suale on•gen aro board porikkao name pass ka•gipa me•chik bi•sarangna scooty bolprakkoba on•anggen. Minggipin uamangni miksonganiranga, cholgrigipa, kangal-cha•asigipa me•chik bi•sarangna jemangan class12ko pass ka•manahachim uamangna indin laptopko suale on•gen, budepa-buchumarangni pensionko tangka 1000/-ko bariatgen, game-ge•e cha•giparang PM Kishan Nidhini gita tangka gong 8000/- bilsio man•anggen. Bi•sarangna scholarshipko on•gen, Manipuro ge•sa skill Universityko songgen aro ge•sa AIIMS koba songgen.
Manipur a•doko re•baenggipa February 28 aro Marchni 5 tariko changgni dake lekka pu•onsusaengon BJP dolrang dam 60 biaprangon susupaenga. “Chinga pilak constituencyrangon chee Manipuro sorkariko rikpiltaichongmotgen” ine Nadda ka•dongbee aganaha.
