Guwahati, Jan 2: Manipur a·doko Bharatiya Janata Party (BJP) sorkariko rikgen aro ia changode BJP doltangari sorkariko rikna man·gen ine Assam a·dokni Chief Minister aro North East Democratic Alliance (NEDA)-ni convenor Himanta Biswa Sarma parakataha.
Manipur a·doko ia bilsini a·bachengachibara Assembly election-ko ong·atna siengachim.
Iani bidingo kobor ra·timgiparang baksa agangrikengon, salgro salaram a·dokrangonaba BJP, pangna jolnan re·bakamaha aro da·o adita election-rangko ong·atani ja·manon manderang iani sakkiko nikna man·gen ine Sarma parakataha.
“Angni hisapsoani gitade, salgro salaram jol gimikon bilsi bongana chu·sokgipa sorkariko rikani ja·man BJP sorkariko rikpiltaigen. Assam aro Arunachal Pradesh a·dokrangode BJP, gnigipa changna sorkariko rikengaha aro Manipur a·dokoba ia changode chinga doltangari sorkariko rikna man·gnok. Batanggimin changode chinga gipin dolrang baksa bakrimesa sorkariko rikaha indiba ia changode chinga an·tangtangan sorkariko rikna man·gnok,” ine Assam-ni Chief Minister aganaha.
Sarma-ni parakatani gitade, Nagaland, Mizoram aro Meghalaya a·dokrangoba NDA aro BJP bilakbatgnok aro Tripura a·dokoba BJP sorkariko rikpiltaina sienga.
BJP baksa bakrimenggipa National People’s Party (NPP)-ni national president Conrad K Sangma-ba adita salrangna skangsan, Manipur Assembly election-o uamang an·tangari susana sienga ine parakatahachim.
Manipur a·doko BJP-chi dilenggipa sorkario NPP-ba bak ong·paenga aro Meghalaya a·dokoba NPP-chi dilenggipa MDA sorkario BJP-ba bak ong·skaengachim.
