Imphal, May 25: Manipur a·doko kajia-golmal ong·anichi so·so-jengjeng ong·ani obostarang jripangani ru·utgijan chanchichipenggipa bobil dolrang aro tom·dakgimin manderang kajia-golmalko ong·attaianichi obostako gital dake ding·chaoataianiko knasona gita man·aha.
Koborko man·soani gita, re·anggipa Butbar salni gisepo Manipur-ni Bishnupur a·jao dingtang dingtang biapo ong·anggipa obostao, saksa bilsi 29-ong·gipa mande gipin gittimni manderangni jakchi goako man·e siangaha, indake sakgni gipinrangba bilongbee jokkom ong·aha aro PWD minister Govindas Konthoujam-ni nokkoba manderang nosto ka·aha ine u·iataha.
Niamchi sinjetaniko on·piltaiatna gita, batanggimin somoio Manipur-o pilak kajia-golmal aro so·so-jengjeng ong·anirang a·bachenggipa Bishnupur a·jao, Manipur sorkari sima-ari gri curfew-ko ra·gatatpilaha aro Imphal West jolo curfew -ko ra·galani somoikoba konta-bri komiatpilaha ine koboroniko knasona gita man·aha.
Indake ong·engon, a·dokni BJP MLA-rang, Manipur-o ong·enggipa obostani bidingo Bristibar salo, ma·mongni home minister Pa Amit Shah-ni Guwahati-ona re·baani somoio gronge agangrikjolna gita Assam-china dobanasienga ineba koborna parakataha.
