Makhel, Dec 28: Manipur a·doko Mao Students Union (MSU)-ni bilsi 88 gapaniko maniani bak gita ong·atenggipa Makhel Heritage Conclave-ko Mongolbar salo, Meghalaya a·dokni Chief Minister Conrad K Sangma, Manipur a·dokni Deputy Chief Minister Joykumar Singh Yumnam baksa do·ga oe on·angaha.
Ia Mao jatrangni gisik ra·na krabegipa program-ko ong·atanio Conrad Sangma, jinmana aganprakangengon, MSU-ni bilsi 88 gapaniko manina ia nambegipa program-ko ong·atahani gimin MSU-ko mittelpilangaha.
Jatni dingtanggipa ong·ani aro jatni man·rikanirangko ripinganio politics aro jatni dakani rikanini gamchatgipa ong·ani giminba ia tom·anio ua aganangaha.
India a·songni bil aro ra·bianiranga chadamberangni jakon ong·a ineba ua, chadamberangni bil aro changa sapanirangko nama bewalo jakkalchina gita didiangaha.
“An·chingni chadamberangan an·chingni dal·batsranggipa bil ong·a. Uamangni changa sapanirangko name jakkaljagenchimode aro a·songni namgnina jakkaljagenchimode uan an·chingna kenna nanggniba ong·a. A·songko rikanio chadamberangko jakkalgenchimosa a·song namroro silrorona man·gen,” ine Sangma aganaha.
Ia tom·anio ua Meghalaya Youth Policy-ni giminba jinmana talate on·angaha aro ia policy-o maikai chadamberangni changa sapanirangko nama bewalo jakkalna sorkari miksongengachim, uani giminba aganangaha.
“Chadambe sakantian mingsa jakni kamko skie ra·na man·na gita aro uamangni changa sapanirangko taridapna gita Meghalaya Youth Policy-o ‘One Skill One Talent’-ko done kam ka·gen,” ine Meghalaya Chief Minister aganaha.
An·tangtangni u·i-ma·sianiosan pangchakaigija a·songni gipin bakrango donggipa chadamberang baksa susagrikgiparang ong·china gitaba Sangma didiangaha.
Ia tom·anio ua Meghalaya a·doko a·bachengatna sienggipa Early Child Development Program-ni giminba aganangaha aro ia program-na World Bank-oniko gong kror 150-mangko man·na sienga ine parakangaha.
Mao Students Union-ko 1933 bilsio bikotahachim aro ian salgro salaram a·dokrango gitchambatsranggipa chatro chatrirangni dolrangoni dolsa ong·engachim.
